អ្នកការទូតជាន់ខ្ពស់របស់សហភាពអឺរ៉ុប (EU) លោកស្រី Kaja Kallas នៅថ្ងៃពុធ (ទី១៧ ខែកញ្ញា) នេះ បានលើកឡើងថា ការចូលរួមរបស់ឥណ្ឌា ក្នុងសមយុទ្ធយោធាជាមួយទីក្រុងមូស្គូ និងការទិញប្រេងពីរុស្ស៊ី «ក្លាយជាឧបសគ្គក្នុងដំណើរផ្លូវនៃទំនាក់ទំនងកាន់តែជិតស្និទ្ធ» ជាមួយប្លុក។

លោកស្រី Kallas បាននិយាយថា «នៅទីបំផុត ភាពជាដៃគូរបស់យើង គឺមិនត្រឹមតែពាក់ព័ន្ធនឹងពាណិជ្ជកម្មប៉ុណ្ណោះទេ ប៉ុន្តែថែមទាំងពាក់ព័ន្ធនឹងការការពារសណ្តាប់ធ្នាប់អន្តរជាតិដែលផ្អែកលើច្បាប់ផងដែរ» ខណៈដែលលោកស្រីបានប្រកាសពីយុទ្ធសាស្ត្ររបស់ប្លុក ដើម្បីពង្រឹងទំនាក់ទំនង រវាង EU និងឥណ្ឌា។

គួរបញ្ជាក់ថា រួមជាមួយសម្ព័ន្ធមិត្តរបស់ទីក្រុងមូស្គូផ្សេងទៀត ដែលរួមមានទាំងអ៊ីរ៉ង់ផងដែរ ឥណ្ឌាបានចូលរួមក្នុងសមយុទ្ធរួមឈ្មោះ Zapad របស់រុស្ស៊ីជាមួយបេឡារុស ក្នុងខែនេះ ជាផ្នែកមួយដែលបានធ្វើឡើងនៅជិតព្រំដែនរបស់ប្រទេសសមាជិកអង្គការណាតូ។

លោកស្រី Kallas បានបញ្ជាក់ថា៖ «ជុំវិញការចូលរួមក្នុងសមយុទ្ធយោធា និងការទិញប្រេង ទាំងនេះគឺជាឧបសគ្គ ចំពោះកិច្ចសហប្រតិបត្តិការរបស់យើង នៅពេលនិយាយអំពីការធ្វើឲ្យទំនាក់ទំនងកាន់តែស៊ីជម្រៅ»។

យ៉ាងណាក្ដី ទោះបីជាមានការមិនចុះសម្រុងគ្នាលើបញ្ហារុស្ស៊ីក៏ដោយ ក៏ EU និងឥណ្ឌាកំពុងធ្វើការ ដើម្បីបញ្ចប់ការចរចាលើកិច្ចព្រមព្រៀងពាណិជ្ជកម្មសេរី នៅចុងឆ្នាំ២០២៥ ចំពេលមានភាពតានតឹងដោយផ្ទាល់របស់ទីក្រុងញូវដេលីជាមួយទីក្រុងវ៉ាស៊ីនតោន។

ទំនាក់ទំនង រវាងសហរដ្ឋអាមេរិក និងឥណ្ឌា មានភាពតានតឹង ចាប់តាំងពីប្រធានាធិបតី លោក Donald Trump បានដំឡើងពន្ធលើការនាំចេញភាគច្រើនរបស់ឥណ្ឌាដល់ ៥០ភាគរយកាលពីខែមុន ជាពន្ធទណ្ឌកម្ម ចំពោះការបន្តទិញប្រេងពីរុស្ស៊ីរបស់ទីក្រុងញូវដេលី៕