យោធាអ៊ីស្រាអែល នៅថ្ងៃពុធ (ទី១៧ ខែកញ្ញា) នេះ បានឲ្យដឹងថា ខ្លួនកំពុងបើកផ្លូវបន្ថែម សម្រាប់រយៈពេល ៤៨ម៉ោង ដែលប្រជាជនប៉ាឡេស្ទីនអាចប្រើប្រាស់ ដើម្បីចាកចេញពីទីក្រុងហ្កាហ្សា ខណៈដែលខ្លួនបានបង្កើនកិច្ចប្រឹងប្រែងធ្វើឲ្យទីក្រុងនេះគ្មានជនស៊ីវិល និងប្រឈមជាមួយយុទ្ធជនរបស់ក្រុមហាម៉ាសរាប់ពាន់នាក់។

មនុស្សរាប់សែននាក់កំពុងជ្រកកោននៅក្នុងទីក្រុង ហើយជាច្រើននាក់មានការស្ទាក់ស្ទើរក្នុងការធ្វើតាមបញ្ជារបស់អ៊ីស្រាអែល ដើម្បីផ្លាស់ទៅភាគខាងត្បូង ដោយសារតែគ្រោះថ្នាក់នៅតាមផ្លូវ ស្ថានភាពអាក្រក់ធ្ងន់ធ្ងរ កង្វះអាហារ នៅតំបន់ភាគខាងត្បូង និងការភ័យខ្លាច ដែលថា ត្រូវបម្លាស់ទីលំនៅអចិន្ត្រៃយ៍។

អាជ្ញាធរសុខាភិបាល ក្នុងតំបន់ បាននិយាយថា យ៉ាងហោចណាស់មនុស្ស ៣០នាក់ ត្រូវបានសម្លាប់នៅទូទាំងតំបន់ហ្កាហ្សាស្ទ្រីប នៅថ្ងៃទី១៧ ខែកញ្ញានេះ អំឡុងការវាយប្រហារចុងក្រោយបង្អស់របស់អ៊ីស្រាអែល ក្នុងនោះមានរួមទាំង ១៩នាក់នៅក្នុងទីក្រុងហ្កាហ្សាផងដែរ។

មួយថ្ងៃបន្ទាប់ពីអ៊ីស្រាអែលបានប្រកាសពីការបើកការវាយលុកផ្លូវគោក ដើម្បីដណ្តើមគ្រប់គ្រងចំណុចកណ្តាលទីក្រុងសំខាន់របស់តំបន់ហ្កាហ្សា រថក្រោះបានរំកិលបន្តិចឆ្ពោះទៅកាន់តំបន់ភាគកណ្តាល និងខាងលិចរបស់ទីក្រុងនេះពីទិសដៅចំនួន ៣ ប៉ុន្តែមិនមានការរុលទៅមុខជាដុំកំភួនណាមួយត្រូវបានរាយការណ៍នោះឡើយ។

មន្ត្រីអ៊ីស្រាអែលម្នាក់ បានបង្ហើបឲ្យដឹងថា ប្រតិបត្តិការយោធានេះ គឺផ្តោតលើការនាំជនស៊ីវិលទៅភាគខាងត្បូង ហើយការប្រយុទ្ធនឹងមានកាន់តែខ្លាំងក្លាឡើង ក្នុងអំឡុងខែតុលា និងខែវិច្ឆិកា៕