ភ្នំពេញ៖ មន្ទីរទេសចរណ៍ខេត្តរតនគិរី បានត្រៀមនូវតំបន់ទេសចរណ៍ប្រមាណ ៣០កន្លែង ដើម្បីទទួលភ្ញៀវជាតិ និងបរទេស ទៅលេងកម្សាន្តខេត្តរតនគិរី នាឱកាសបុណ្យចូលឆ្នាំប្រពៃណីចិន និងវៀតណាមនាពេលខាងមុខនេះ។
ក្នុងសន្និសីទសារព័ត៌មានស្តីពី វឌ្ឍនភាពមូលដ្ឋានឃុំសង្កាត់ និងទិសដៅបន្តខេត្តរតនគិរី ថ្ងៃទី២៧ ខែមករា ឆ្នាំ២០២២ នាទីស្ដីការគណៈរដ្ឋមន្ត្រី លោក ង៉ែត វិទូ ប្រធានមន្ទីរទេសចរណ៍ខេត្តរតនគិរី លើកឡើងថា ខេត្តរតនគិរី នៅឆ្នាំ២០២១កន្លងទៅទទួលបានភ្ញៀវទេសចរណ៍ជាង ១២ម៉ឺននាក់ ដោយសារវិបត្តិជំងឺកូវីដ-១៩ ធ្វើឲ្យមានការថយចុះច្រើននៃភ្ញៀវទេសចរណ៍ ខណៈនៅឆ្នាំ២០១៩ មានភ្ញៀវទៅលេងនៅរតនគិរី រហូតដល់ជាង ២០ម៉ឺននាក់។
លោកបន្តថា បច្ចុប្បន្នខេត្តរតនគិរី បានពង្រីកតំបន់ទេសចរណ៍ពីជាង ១៤កន្លែង កើនដល់៣០កន្លែង ដែលមានទាំងតំបន់ទេសចរណ៍ធម្មជាតិ និងវប្បធម៌ជាដើម ហើយអាជ្ញាធរខេត្ត ក៏មានការចងក្រងជាសហគមន៍ទេសចរណ៍ រួមទាំងទីតាំងសេវាកម្សាន្ត នាពេលរាត្រីជាច្រើនកន្លែងទៀត ។
ក្នុងឱកាសនោះ ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្តរតនគិរី មានប្រសាសន៍ថា ដើម្បីឲ្យវិស័យទេសចរណ៍មានការរីកចម្រើន អាជ្ញាធរខេត្តកំពុងរៀបចំតំបន់ទេសចរណ៍កាចាញ រួមទាំងក្រុងបាលុង រួមទាំងតំបន់ទេសចរណ៍ផ្សេងៗទៀត ឲ្យកាន់តែមានសោភ័ណភាព ខណៈវិស័យហេដ្ឋារចនាសម្ព័ន្ធនានា ក៏កំពុងអភិវឌ្ឍជាបន្តបន្ទាប់។
គួរបញ្ជាក់ថា ខេត្តរតនគិរីមានតំបន់ទេសចរណ៍ទាក់ទាញជាច្រើនកន្លែង ដូចជាស្រះយក្សឡោម បឹងកាចាញ ផ្ទះជនជាតិដើមភាគតិច រួមទាំងកន្លែងជាច្រើនទៀត ដោយអាជ្ញាធរខេត្ត មានគោលបំណងទាក់ទាញភ្ញៀវទេសចរណ៍ ទៅលេងកម្សាន្តក្នុងខេត្តភូមិភាគឦសាន្តមួយនេះ កើនដល់ជាង ៣០ម៉ឺននាក់ ក្នុងមួយឆ្នាំៗ៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
