ធនាគារកណ្ដាលរបស់សហរដ្ឋអាមេរិក បានប្រកាសពីការកាត់បន្ថយអត្រាការប្រាក់ដែលរំពឹងទុកជាយូរ កាលពីថ្ងៃពុធ (១៧ កញ្ញា) ដែលជាជំហានមួយបង្ហាញថា ក្ដីបារម្ភនៃការធ្លាក់ចុះក្នុងទីផ្សារការងារ ឥឡូវនេះកើនឡើងលើសកង្វល់អតិផរណា។

នេះជាការបន្ថយអត្រាការប្រាក់លើកដំបូងហើយរបស់ធនាគារកណ្ដាលអាមេរិក ក្នុងឆ្នាំ២០២៥។ អ្នកបង្កើតគោលនយោបាយបានសម្រេចបន្ទាបការប្រាក់ ១ភាគ៤ ឬ ០,២៥% ទៅនឹងអត្រាគោល ៤,៥% របស់ធនាគារកណ្តាលស្របតាមការរំពឹងទុក ដោយឥឡូវនេះ អត្រាថ្មីត្រូវបានកំណត់នៅចន្លោះ ៤% ទៅ ៤,២៥%។ ក្នុងសន្និសីទសារព័ត៌មានកាលពីថ្ងៃពុធបន្ទាប់ពីប្រកាសអត្រាការប្រាក់ថ្មីរួច ប្រធានធនាគារកណ្ដាល លោក Jerome Powell និយាយថា "ទីផ្សារការងារពិតជាត្រជាក់ស្រេប"។

ទីផ្សារការងារអាមេរិក ហាក់ដូចជាថយចុះខ្លាំងដែលជាហានិភ័យសម្រាប់សេដ្ឋកិច្ច។ របាយការណ៍ការងាររបស់ខែសីហា បង្ហាញថា ការងារត្រឹមតែ ២២.០០០មុខតំណែង ត្រូវបានបន្ថែម ពោលគឺទាបខ្លាំងជាងការរំពឹងទុករបស់សេដ្ឋវិទូ។ របាយការណ៍នោះក៏បង្ហាញថាពលរដ្ឋអាមេរិក បាត់បង់ការងារជាច្រើនក្នុងខែមិថុនា ដោយរហូតមកដល់ពេលនេះ សេដ្ឋកិច្ចបានបន្ថែមការងារចំនួន ៥៩៨.០០០មុខតំណែងប៉ុណ្ណោះ ធៀបនឹង ១,៤លានការងារ សម្រាប់ពេល ៨ខែដំបូងនៃឆ្នាំ២០២៤។

រដ្ឋបាលលោកប្រធានាធិបតី Donald Trump បានដាក់សម្ពាធដែលមិនធ្លាប់មានពីមុនមកលើលោក Powell ឱ្យបន្ថយអត្រាការប្រាក់ជាយូរមកហើយ ប៉ុន្តែលោក Powell និងធនាគារកណ្ដាលទាំងមូលបានតតាំងនឹងសម្ពាធរបស់លោក Trump ដោយនិយាយថា ទាំងភាពអត់ការងារធ្វើ និងអតិផរណានៅកម្រិតអាក្រក់ខ្លាំង មានន័យថា គេត្រូវតែប្រុងប្រយ័ត្នរឿងអត្រាការប្រាក់ មិនឱ្យឡើងកម្ដៅសេដ្ឋកិច្ច៕