រដ្ឋមន្ត្រីការពារជាតិចិន លោក Dong Jun នៅក្នុងថ្ងៃព្រហស្បតិ៍ (១៨ កញ្ញា) នេះ បានជំរុញឱ្យមានការខិតខំប្រឹងប្រែងកាន់តែខ្លាំងឡើងសម្រាប់ការឯកភាពជាសកល ដោយព្រមានប្រឆាំងនឹងពិភពលោកដែលបែកបាក់យ៉ាងគ្រោះថ្នាក់ដោយសារតែ "ការគ្រប់គ្រងដោយប្រើច្បាប់ព្រៃ"។

ថ្លែងបើកវេទិកាសន្តិសុខ Xiangshan ជាផ្លូវការនៅទីក្រុងប៉េកាំង លោក Dong បាននិយាយថា ពិភពលោកត្រូវគ្របដណ្ដប់ដោយផ្នត់គំនិតសង្គ្រាមត្រជាក់ អនុត្តរភាព និងការគាំពារនិយម។ លោកលើកឡើងថា៖ "ការជ្រៀតជ្រែកផ្នែកយោធាពីខាងក្រៅ ការព្យាយាមវាតទីឥទ្ធិពល និងការបង្ខិតបង្ខំអ្នកដទៃឱ្យចូលបក្សពួក នឹងធ្វើឱ្យសហគមន៍អន្តរជាតិមានភាពវឹកវរ" ដោយបន្ថែមថា "ពិភពលោកកំពុងស្ថិតលើផ្លូវបំបែកជាថ្មីម្ដងទៀត ហើយត្រូវជ្រើសរើសការសន្ទនា ជំនួសឱ្យការប្រឈមមុខដាក់គ្នា"។

លោក Dong បាននិយាយទៀតថា ការឈ្លក់វង្វេងជាមួយនឹងឧត្តមភាពដាច់ខាតក្នុងកម្លាំងយោធា និងវិធីសាស្រ្ត "អុ្នកខ្លាំងគឺត្រូវ" នឹងនាំទៅរកពិភពលោកដែលបែកបាក់ដោយសារច្បាប់ព្រៃ និងភាពវឹកវរ។ លោកសង្កត់ធ្ងន់ថា យោធាចិនដ៏រឹងមាំនឹងក្លាយជាកម្លាំងសម្រាប់សន្តិភាព។

ការលើកឡើងរបស់លោក Dong នេះ បានធ្វើឡើងបន្ទាប់ពីសុន្ទរកថាថ្មីៗរបស់លោកប្រធានាធិបតី Xi Jinping ប្រឆាំងនឹង "អនុត្តរភាព និងអំណាចនយោបាយ" ក្នុងក្បួនដង្ហែរយោធាដ៏ធំមួយនៅទីក្រុងប៉េកាំងកាលពីដើមខែនេះ ដែលបានបង្ហាញអាវុធថ្មីៗជាច្រើនរបស់ចិន៕