កងកម្លាំងសម្ព័ន្ធយោធាណាតូ បានបង្ហាញសមត្ថភាពវាយប្រហារនៅក្នុងប្រទេសប៉ូឡូញ កាលពីថ្ងៃពុធ (១៧ កញ្ញា) ដោយមានរថក្រោះ ឧទ្ធម្ភាគចក្រ និងយន្តហោះចម្បាំងបានមកចូលរួម។ សមយុទ្ធ ដែលមានឈ្មោះកូដថា Iron Gate ធ្វើឡើងស្របពេលជាមួយសមយុទ្ធ Zapad រវាងរុស្ស៊ីនិងបេឡារុសរួមគ្នានៅព្រំដែនប្រទេសបេឡារុស។

យោធាប្រទេសប៉ូឡូញ បាននិយាយថា សមយុទ្ធទាំងនេះ ជាផ្នែកនៃសមយុទ្ធដ៏ទូលំទូលាយមានឈ្មោះថា Iron Defender ដែលផ្តោតសំខាន់លើសមត្ថភាពការពារប្រទេសប៉ូឡូញក្នុងករណីមានការវាយប្រហារពីភាគខាងកើត។ សមយុទ្ធ Iron Gate មានលក្ខណៈពិសេសទាំងទាហានប៉ូឡូញ និងសម្ព័ន្ធមិត្ត រួមទាំងក្រុម V Corps របស់កងទ័ពសហរដ្ឋអាមេរិក ដែលមានទីបញ្ជាការទី២របស់ខ្លួននៅក្នុងប្រទេសប៉ូឡូញ។

ទន្ទឹមនឹងនេះ យោធាប្រទេសក្រូអាតបានបង្ហាញរថក្រោះ យន្តហោះចម្បាំង និងឧទ្ធម្ភាគចក្ររបស់ខ្លួនកាលពីថ្ងៃពុធ ទី១៧ ខែកញ្ញា នៅក្នុងសមយុទ្ធយោធារួមបញ្ចូលគ្នាដែលមានយុទ្ធោបករណ៍សម្ព័ន្ធយោធាណាតូ។

សមយុទ្ធនេះ មានយុទ្ធោបករណ៍ពិសេសចាប់ពីរថក្រោះ M84 សម័យយូហ្គោស្លាវី រហូតដល់យន្តហោះចម្បាំង Rafale ទំនើប និងឧទ្ធម្ភាគចក្រ Kiowa ផលិតដោយសហរដ្ឋអាមេរិក។

សមយុទ្ធនេះធ្វើឡើងមួយសប្តាហ៍បន្ទាប់ពីប្រទេសប៉ូឡូញ បានបាញ់ទម្លាក់យានដ្រូនរបស់រុស្ស៊ីនៅក្នុងដែនអាកាសរបស់ខ្លួនជាលើកដំបូង។ រដ្ឋមន្ត្រីការពារជាតិ លោក Ivan Anusic បាននិយាយថា សម្ព័ន្ធយោធាណាតូត្រូវតែ «រឹងមាំ និងធន់ទៅនឹងការបង្កហេតុ»។