ប្រទេសអារ៉ាប៊ីសាអ៊ូឌីត និងប៉ាគីស្ថានដែលមានអាវុធនុយក្លេអ៊ែរ បានចុះហត្ថលេខាលើកិច្ចព្រមព្រៀងការពារជាតិទៅវិញទៅមកជាផ្លូវការកាលពីថ្ងៃពុធ ទី១៧ ខែកញ្ញា ក្នុងចំណាត់ការមួយដែលពង្រឹងយ៉ាងសំខាន់នូវភាពជាដៃគូសន្តិសុខរយៈពេលច្រើនទសវត្សរ៍ក្នុងពេលមានភាពតានតឹងក្នុងតំបន់កើនឡើង។

ទំនាក់ទំនងការពារជាតិដែលត្រូវបានពង្រឹងធ្វើឡើងនៅពេលដែលបណ្តារដ្ឋឈូងសមុទ្រអារ៉ាប់មានការប្រុងប្រយ័ត្នកាន់តែខ្លាំងជុំវិញភាពជឿជាក់របស់សហរដ្ឋអាមេរិកជាអ្នកធានាសន្តិសុខយូរអង្វែង។ ការវាយប្រហាររបស់អ៊ីស្រាអែលលើប្រទេសកាតាកាលពីសប្តាហ៍មុន បានបង្កើនការព្រួយបារម្ភទាំងនោះ។

ការប៉ុនប៉ងរបស់អ៊ីស្រាអែលក្នុងការសម្លាប់មេដឹកនាំនយោបាយរបស់ក្រុមហាម៉ាសដោយការវាយប្រហារតាមអាកាសទៅលើទីក្រុងដូហាខណៈក្រុមនេះកំពុងពិភាក្សាអំពីសំណើបទឈប់បាញ់ដែលប្រទេសកាតា កំពុងជួយសម្របសម្រួល ដោយបានធ្វើឲ្យប្រទេសអារ៉ាប់ខឹងសម្បារ។ 

សម្ព័ន្ធមិត្តរបស់ទីក្រុងវ៉ាស៊ីនតោននិងរដ្ឋឈូងសមុទ្រ បានស្វះស្វែងរកស្ថិរភាពទំនាក់ទំនងជាមួយប្រទេសអ៊ីរ៉ង់ និងអ៊ីស្រាអែល ដើម្បីដោះស្រាយក្តីបារម្ភសន្តិសុខ។ ប៉ុន្តែសង្រ្គាមនៅតំបន់ហ្កាហ្សាបានធ្វើឲ្យតំបន់នេះកែប្រែ ហើយប្រទេសកាតារដ្ឋឈូងសមុទ្រ ត្រូវរងការវាយប្រហារផ្ទាល់ពីរលើកក្នុងមួយឆ្នាំ ម្តងដោយអ៊ីរ៉ង់និងម្តងទៀតដោយអ៊ីស្រាអែល។ មន្ត្រីជាន់ខ្ពស់ប្រទេសអារ៉ាប៊ីសាអ៊ូឌីតម្នាក់ បានទទួលស្គាល់ពីតម្រូវការដើម្បីធ្វើឱ្យមានតុល្យភាពទំនាក់ទំនងជាមួយគូប្រជែងរបស់ប៉ាគីស្ថាន គឺប្រទេសឥណ្ឌា ដែលជាមហាអំណាចនុយក្លេអ៊ែរផងដែរ។