ប្រធានគណៈកម្មការសហភាពអាហ្រ្វិក លោក Mahmoud Ali Youssouf បានជួបជាមួយទីប្រឹក្សាជាន់ខ្ពស់សហរដ្ឋអាមេរិកប្រចាំទ្វីបអាហ្រ្វិក លោក Massad Boulos នៅទីបញ្ជាការសហភាពអាហ្វ្រិក កាលពីថ្ងៃពុធ ទី១៧ ខែកញ្ញា ដោយលើកឡើងពីកិច្ចខិតខំប្រឹងប្រែងផ្នែកការទូតដែលកំពុងបន្តដើម្បីបញ្ចប់សង្រ្គាមស៊ីវិលនៅប្រទេសស៊ូដង់។

លោក Youssouf បានប្រាប់អ្នកសារព័ត៌មានថា «សហភាពអាហ្រ្វិកបន្តចូលរួមជាមួយភាគីពាក់ព័ន្ធ ដើម្បីឈានដល់បទឈប់បាញ់»។ «នោះនឹងជួយដល់ប្រជាជនស៊ូដង់ក្នុងការបញ្ចប់សង្រ្គាមនេះ រៀបចំការបោះឆ្នោត និងអនុញ្ញាតឱ្យស៊ីវិលគ្រប់គ្រងប្រទេស»។

លោក Boulos បានកោតសរសើរចំពោះភាពជោគជ័យផ្នែកការទូតនាពេលថ្មីៗនេះរបស់សហភាពអាហ្វ្រិក ដោយនិយាយថា «ខ្ញុំអរគុណសម្រាប់ការរួមចំណែករបស់សហភាពអាហ្វ្រិក ចំពោះកិច្ចព្រមព្រៀងសន្តិភាពនៅកុងហ្គោភាគខាងកើត និងរវាងសាធារណរដ្ឋប្រជាធិបតេយ្យកុងហ្គោនិងប្រទេសរ៉្វាន់ដា»។

កិច្ចព្រមព្រៀងសន្តិភាពកាលពីខែមិថុនាដែលសម្របសម្រួលដោយរដ្ឋបាល លោក Trump ត្រូវបានគេសាទរថាជាការបញ្ចប់ជម្លោះរយៈពេល៣០ឆ្នាំនៅក្នុងតំបន់ Great Lakes ។ មន្ត្រីទាំងពីរបានសង្កត់ធ្ងន់លើតម្រូវការសម្រាប់ការសម្របសម្រួលអន្តរជាតិប្រកបដោយនិរន្តរភាព ដើម្បីទទួលបាននូវសន្តិភាពយូរអង្វែងនៅទូទាំងតំបន់។