ប្រធានាធិបតីប្រទេសស៊ីរី លោក Ahmed al-Sharaa បាននិយាយថា កិច្ចពិភាក្សាសន្តិសុខជាមួយអ៊ីស្រាអែល គឺ«ចាំបាច់» ហើយអាចនាំទៅរកលទ្ធផលនៅក្នុង «ប៉ុន្មានថ្ងៃខាងមុខនេះ»។ លោក Al-Sharaa ដែលបានដឹកនាំកម្លាំងផ្តួលរំលំអតីតប្រធានាធិបតីលោក Bashar al-Assad កាលពីខែធ្នូ ដោយបានបញ្ចប់សង្គ្រាមរយៈពេល១៣ឆ្នាំរបស់ប្រទេសនេះ បានធ្វើការអត្ថាធិប្បាយទៅកាន់អ្នកសារព័ត៌មានកាលពីថ្ងៃពុធ។

អ៊ីស្រាអែល បានឆ្លើយតបទៅនឹងការផ្តួលរំលំរបបលោក al-Assad ដោយប្រកាសថា កិច្ចព្រមព្រៀងសន្តិសុខឆ្នាំ១៩៧៤ ជាមួយស៊ីរីដួលរលំ ហើយនិងបង្កើនចំនួនដែនដីនៅស៊ីរីដែលអ៊ីស្រាអែលគ្រប់គ្រង ព្រមទាំងបង្កើនការវាយប្រហារតាមអាកាសនៅក្នុងប្រទេសស៊ីរី ដែលបានសម្លាប់ទាហានស៊ីរីច្រើននាក់ក្នុងរយៈពេលប៉ុន្មានខែកន្លងទៅនេះ។

សហរដ្ឋអាមេរិក ដែលបានគាំទ្រអាជ្ញាធរថ្មីរបស់ប្រទេសស៊ីរីបានព្យាយាមសម្របសម្រួលកិច្ចព្រមព្រៀងរវាងស៊ីរីនិងអ៊ីស្រាអែល។ ទោះជាយ៉ាងណា លោក al-Sharaa បាននិយាយថា សហរដ្ឋអាមេរិក មិនបានដាក់សម្ពាធលើប្រទេសស៊ីរីឱ្យចុះកិច្ចព្រមព្រៀងជាមួយអ៊ីស្រាអែលទេ ហើយជំនួសមកវិញនូវតួនាទីជាអ្នកសម្របសម្រួល។ ប្រធានាធិបតីស៊ីរី បាននិយាយបន្ថែមថា កិច្ចព្រមព្រៀងដ៏មានសក្តានុពលរវាងអ៊ីស្រាអែលនិងស៊ីរី នឹងត្រូវគោរពដែនអាកាសរបស់ប្រទេសស៊ីរី ដែលអ៊ីស្រាអែលបានបំពានដដែលៗជាច្រើនឆ្នាំ ព្រមទាំងបូរណភាពទឹកដីរបស់ប្រទេសស៊ីរីផងដែរ។ លោកនិយាយថា អង្គការសហប្រជាជាតិ នឹងត្រូវត្រួតពិនិត្យកិច្ចព្រមព្រៀង។

លោក al-Sharaa បានលើកឡើងថា កិច្ចព្រមព្រៀងសន្តិសុខអាចឈានទៅរកកិច្ចព្រមព្រៀងផ្សេងទៀតដែលត្រូវសម្រេចបាន ប៉ុន្តែកិច្ចព្រមព្រៀងធ្វើឱ្យមានប្រក្រតីភាពរវាងប្រទេសទាំងពីរនាពេលនេះ ពុំមាននៅលើតុនោះទេ។