វិមានក្រឹមឡាំងនិយាយថា ប្រធានាធិបតីរុស្ស៊ី លោក Vladimir Putin បានពិភាក្សាអំពីទំនាក់ទំនងទ្វេភាគី និងស្ថានភាពជុំវិញបញ្ហានៅអ៊ុយក្រែននៅក្នុងការសន្ទនាតាមទូរស័ព្ទជាមួយនាយករដ្ឋមន្ត្រីឥណ្ឌា លោក Narendra Modi កាលពីថ្ងៃពុធ។

លោក Putin បាននិយាយថា ទំនាក់ទំនងរវាងរុស្ស៊ី និងឥណ្ឌា មានជាលក្ខណៈមិត្តភាពនៅក្នុងប្រវត្តិសាស្ត្រទំនើបដោយផ្អែកលើការគាំទ្រជាតិរួមគ្នានៅក្នុងប្រទេសទាំងពីរ។ មេដឹកនាំទាំងពីរ បានសម្តែងការពេញចិត្តចំពោះការវិវឌ្ឍន៍ប្រកបដោយភាពជោគជ័យនាពេលបច្ចុប្បន្ននៃទំនាក់ទំនងរុស្ស៊ី-ឥណ្ឌា។

វិមានក្រឹមឡាំងបាននិយាយថា «មេដឹកនាំ បានពិភាក្សាអំពីការត្រៀមរៀបចំសម្រាប់ដំណើរទស្សនកិច្ចរបស់ប្រធានាធិបតីរុស្ស៊ីទៅកាន់ប្រទេសឥណ្ឌាក្នុងខែធ្នូ ឆ្នាំនេះ ហើយថែមទាំងពិភាក្សាលើបញ្ហាអន្តរជាតិជាច្រើន រួមទាំងជុំវិញស្ថានភាពសង្គ្រាមនៅអ៊ុយក្រែន»។

បន្ទាប់ពីការសន្ទនាតាមទូរស័ព្ទ លោក Modi បានសរសេរនៅលើបណ្តាញ X ថា ឥណ្ឌាប្តេជ្ញាពង្រឹងទំនាក់ទំនងបន្ថែមទៀតជាមួយរុស្ស៊ី ហើយត្រៀមជាស្រេចដើម្បី «ធ្វើការរួមចំណែកដែលអាចធ្វើទៅបានឆ្ពោះទៅរកដំណោះស្រាយដោយសន្តិវិធីនៃជម្លោះនៅអ៊ុយក្រែន»។