សារព័ត៌មាន The Times បានរាយការណ៍ថា ចក្រភពអង់គ្លេសនឹងទទួលស្គាល់រដ្ឋប៉ាឡេស្ទីនជាផ្លូវការនៅចុងសប្តាហ៍នេះ បន្ទាប់ពីប្រធានាធិបតីអាមេរិក លោក Donald Trump ដែលប្រឆាំងនឹងការសម្រេចបែបនេះនោះ បានចាកចេញពីប្រទេស នៅពេលបញ្ចប់ដំណើរទស្សនកិច្ចផ្លូវរដ្ឋរបស់លោក។

លោកនាយករដ្ឋមន្ត្រី Keir Starmer បានព្រមានកាលពីខែកក្កដាថា ចក្រភពអង់គ្លេសនឹងមានចំណាត់ការនេះ ប្រសិនបើអ៊ីស្រាអែលមិនចាត់វិធនាការ ដើម្បីបន្ធូរបន្ថយការរងទុក្ខវេទនា នៅតំបន់ហ្កាហ្សា និងឈានដល់បទឈប់បាញ់ ក្នុងសង្គ្រាមជិត ២ឆ្នាំរបស់ខ្លួន ជាមួយក្រុមហាម៉ាស។ អ៊ីស្រាអែលលើកឡើងថា ការទទួលស្គាល់រដ្ឋប៉ាឡេស្ទីន ដែលបារាំង កាណាដា និងអូស្ត្រាលី ក៏បាននិយាយដែរថា ពួកគេនឹងធ្វើដូច្នេះនៅខែកញ្ញានេះនោះ នឹងផ្តល់រង្វាន់ដល់ក្រុមហាម៉ាស។

ដោយមិនបានដកស្រង់ប្រភពរបស់ខ្លួន សារព័ត៌មាន The Times បានឲ្យដឹងថា ចក្រភពអង់គ្លេសនឹងចេញសេចក្តីប្រកាស នៅពេលដែលលោក Trump បញ្ចប់ដំណើរទស្សនកិច្ច នៅថ្ងៃព្រហស្បតិ៍ (ទី១៨ ខែកញ្ញា) នេះ។ ក្រសួងការបរទេសរបស់ចក្រភពអង់គ្លេសមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងសេចក្ដីរាយការណ៍នេះ។ កាលពីខែកក្កដា លោក Trump ដែលបច្ចុប្បន្នកំពុងរីករាយនឹងដំណើរទស្សនកិច្ចផ្លូវរដ្ឋជាលើកទី ២ ដែលមិនធ្លាប់មានពីមុនមកនៅចក្រភពអង់គ្លេស បានបញ្ជាក់ថា លោកមិនមានបញ្ហានោះទេ ប្រសិនបើចក្រភពអង់គ្លេសចាត់នូវវិធានការនេះ ប៉ុន្តែចាប់តាំងពីពេលនោះមក សហរដ្ឋអាមេរិក បានបង្ហាញយ៉ាងច្បាស់លាស់នូវការប្រឆាំងរបស់ខ្លួន ចំពោះចំណាត់ការបែបនេះរបស់សម្ព័ន្ធមិត្តអឺរ៉ុប។

លោក Starmer ដែលស្ថិតក្រោមសម្ពាធពីអ្នកនយោបាយមួយចំនួន នៅក្នុងគណបក្សការងាររបស់លោកឲ្យប្រកាន់ជំហរម៉ឺងម៉ាត់ ចំពោះអ៊ីស្រាអែល បាននិយាយថា ចក្រភពអង់គ្លេសនឹងទទួលស្គាល់ភាពជារដ្ឋរបស់ប៉ាឡេស្ទីន នៅឯមហាសន្និបាតអង្គការសហប្រជាជាតិ នាសប្តាហ៍ក្រោយ ប្រសិនបើអ៊ីស្រាអែលចាត់វិធានការចាំបាច់ ដើម្បីស្ថានភាពងាក្រក់ នៅតំបន់ហ្កាហ្សា។ ចក្រភពអង់គ្លេសបានគាំទ្រជាយូរមកហើយនូវគោលនយោបាយនៃ «ដំណោះស្រាយរដ្ឋ ២» សម្រាប់ការបញ្ចប់ជម្លោះ នៅក្នុងតំបន់ ប៉ុន្តែនៅមុននេះ បានប្រាប់ថា ការធ្វើនេះអាចកើតឡើងបានតែនៅពេលមានពេលវេលាសមស្រប៕