ពាក្យស្លោកគាំទ្រប៉ាឡេស្ទីន ត្រូវបានបន្លឺឡើងនៅជុំវិញ Ovo Arena Wembley របស់ទីក្រុងឡុងដ្រ៍ កាលពីថ្ងៃពុធ (ទី១៧ ខែកញ្ញា) ជាទីដែលសំបុត្រនៃទីកន្លែងផ្ទុកមនុស្ស ១២.៥០០នាក់ ត្រូវបានលក់អស់គ្មានសល់ សម្រាប់ព្រឹត្តិការណ៍រៃអង្គាសប្រាក់ដ៏ធំបំផុតរបស់ចក្រភពអង់គ្លេស ពោលគឺកម្មវិធីដែលត្រូវបានរៀបចំឡើង សម្រាប់ប្រជាជននៅតំបន់ហ្កាហ្សា។

ការប្រគុំតន្ត្រីឈ្មោះ «Together for Palestine» (T4P) ដែលសំបុត្រមួយសន្លឹកតម្លៃ ៧០ផោន (៩៥ដុល្លារ) គឺជាព្រឹត្តិការណ៍ចុងក្រោយបង្អស់ នៅក្នុងកម្មវិធីជាបន្តបន្ទាប់ដែលរៀបចំឡើង ដើម្បីគាំទ្រប៉ាឡេស្ទីន នៅរដ្ឋធានីរបស់ចក្រភពអង់គ្លេស ជាទីកន្លែងដែលបានឃើញរលកនៃការដើរហែក្បួន និងបាតុកម្ម ចាប់តាំងពីជម្លោះ បានចាប់ផ្តើមផ្ទុះឡើងកាលពីជិត ២ឆ្នាំមុន។

តន្ត្រីករអង់គ្លេស និងសកម្មជននយោបាយ លោក Brian Eno បានរៀបចំកម្មវិធីរៃអង្គាសថវិកានេះឡើង ដើម្បីគាំទ្រដល់អង្គការសប្បុរសធម៌ដែលធ្វើការនៅក្នុងដែនដីប៉ាឡេស្ទីន និងជំរុញឲ្យតារាល្បីៗផ្សេងទៀតហ៊ាននិយាយបញ្ចេញមតិយោបល់។ លោក Eno បានប្រាប់បណ្ដាញសារព័ត៌មានថា គ្មានកន្លែងណានឹងទទួលយកការរៀបចំព្រឹត្តិការណ៍ដែលមានពាក្យថា «ប៉ាឡេស្ទីន» កាលពីឆ្នាំមុន។ ប៉ុន្តែលោកបានបញ្ជាក់ថា៖ «អ្វីៗបានផ្លាស់ប្តូរ។ អ៊ីស្រាអែលគិតថា ការធ្វើឲ្យប្រជាជនទាំងមូលអត់ឃ្លាន នឹងនាំឲ្យមនុស្សគ្រប់គ្នាទទួលយកវិធានការរបស់ខ្លួន។ ខ្ញុំគិតថា ប្រជាជនបានផ្លាស់ប្ដូរគំនិតហើយ»។

អង្គការសហប្រជាជាតិ (UN) កាលពីខែមុន បានប្រកាសជាផ្លូវការនូវទុរ្ភិក្ស នៅក្នុងតំបន់ហ្កាហ្សា ដោយបន្ទោស «ការរាំងខ្ទប់ជាប្រព័ន្ធ» ចំពោះជំនួយ ពីសំណាក់អ៊ីស្រាអែល អំឡុងសង្រ្គាម។ អ្នកចូលរួមកម្មវិធីប្រគុំតន្ត្រី T4P បានប្រាប់ថា វាមិនអាចទទួលយកបានទេ ក្នុងការនៅស្ងៀមមិននិយាយអ្វីនោះ។ ហ្វូងមនុស្សជាច្រើនដែលគ្រវីទង់ជាតិប៉ាឡេស្ទីន បានអបអរសាទរលោកស្រី Francesca Albanese អ្នករាយការណ៍ពិសេសរបស់ UN ទទួលបន្ទុកសិទ្ធិមនុស្ស ក្នុងដែនដីប៉ាឡេស្ទីន ដែលបានប្រឈមនឹងការរិះគន់យ៉ាងខ្លាំងពីអ៊ីស្រាអែល និងសម្ព័ន្ធមិត្តមួយចំនួន៕