ប្រធានាធិបតីសហរដ្ឋអាមេរិក លោក Donald Trump កាលពីថ្ងៃពុធ ទី១៧ ខែកញ្ញា បានបង្ហាញចំណាត់ការថ្មីប្រឆាំងក្រុមឆ្វេងនិយម បន្ទាប់ពីឃាតកម្មលើសកម្មជននយោបាយស្តាំនិយម លោក Charlie Kirk ដោយកំណត់គោលដៅលើចលនាប្រឆាំងហ្វាស៊ីសនិយម Antifa ថាជា «អង្គការភេរវកម្ម»។

លោក Trump បាននិយាយនៅលើបណ្តាញ Truth Social ថា លោកកំពុង កំណត់ចលនានេះថាជាអង្គការភេរវកម្ម។ លោក Trump បានសរសេរថា «ខ្ញុំក៏នឹងផ្តល់ការណែនាំយ៉ាងម៉ឺងម៉ាត់ថា អ្នកទាំងឡាយដែលផ្តល់មូលនិធិដល់ចលនា ANTIFA ត្រូវតែបានស៊ើបអង្កេតឱ្យបានហ្មត់ចត់ដោយអនុវត្តស្តង់ដារច្បាប់ និងជាការអនុវត្តខ្ពស់បំផុត»។

អ្នកជំនាញបាននិយាយថា ចលនា Antifa គឺជាចលនាមនោគមវិជ្ជាដែលត្រូវបានរៀបចំយ៉ាងធូររលុង ដោយគ្មានរចនាសម្ព័ន្ធដឹកនាំច្បាស់លាស់ ឬឋានានុក្រម។

មួយថ្ងៃបន្ទាប់ពីរដ្ឋអាជ្ញា រដ្ឋUtah បានបង្ហាញការចោទប្រកាន់ជាផ្លូវការលើជនសង្ស័យក្នុងករណីឃាតកម្មលើលោក Charlie Kirk គ្មានភស្តុតាងណាមួយបានលេចចេញពីការជាប់ទំនាក់ទំនងជាមួយ លោក Tyler Robinson អាយុ២២ឆ្នាំជាមួយនឹងក្រុមខាងក្រៅណាមួយឡើយ។

លោក Trump និងមន្ត្រីជាន់ខ្ពស់ជាច្រើន បានដាក់កំហុសដដែលៗចំពោះក្រុមឆ្វេងនិយមសម្រាប់ការបង្កើតបរិយាកាសអរិភាពចំពោះក្រុមអភិរក្សនិយម មុនពេលឃាតកម្មលើលោក Kirk ។ ក្រុមអ្នករិះគន់និយាយថា លោក Trump កំពុងប្រើប្រាស់ការធ្វើឃាតលោក Kirk ជាលេសដើម្បីបង្ក្រាបអ្នកប្រឆាំងនយោបាយ។