ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងសមាគមអ្នកចិញ្ចឹមសត្វកម្ពុជា បានដុតកម្ទេចចោលសាច់បង្កកខូចគុណភាពសរុប ២៦ ១៦០ គីឡូក្រាម នៅទីលានចាក់សំរាម ខណ្ឌដង្កោ រាជធានីភ្នំពេញ កាលពីព្រឹកថ្ងៃទី១៨ ខែកញ្ញា ឆ្នាំ២០២៥។

សាច់បង្កកដែលត្រូវកម្ទេចចោល ត្រូវបានដកហូតចេញពីកន្លែងស្តុកសាច់បង្កកចម្រុះចំនួន ២កន្លែង និងរថយន្តដឹកសាច់ ១គ្រឿង នៅក្នុងរាជធានីភ្នំពេញ ក្នុងនោះរួមមាន ឆ្អឹងជំនីជ្រូក.សសៃគោ.គូទមាន់ .ខ្លាញ់ជ្រូក .ស្លាបមាន់ .សាច់មាន់កិន .សាច់គោ .សាច់ជ្រូក និងសសៃជើងមាន់ នេះបើតាមការបញ្ជាក់ពីលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ៕