ប្រធានគណៈកម្មការអឺរ៉ុប លោកស្រី Ursula von der Leyen នៅថ្ងៃព្រហស្បតិ៍ (ទី១៨ ខែកញ្ញា) នេះ បានលើកឡើងថា សហភាពអឺរ៉ុប (EU) ត្រូវតែស្វែងរកកិច្ចព្រមព្រៀងពាណិជ្ជកម្មជាមួយប្រទេសនានា ដូចជាឥណ្ឌាជាដើម ដើម្បីកាត់បន្ថយការពឹងផ្អែកលើប្រទេសតែមួយ ដោយការដំឡើងពន្ធនាំចូលរបស់សហរដ្ឋអាមេរិកកាន់តែខ្ពស់ ជំរុញឲ្យប្លុកនេះត្រូវធ្វើពិពិធកម្មទំនាក់ទំនងរបស់ខ្លួន។

នៅក្នុងសន្និសីទមួយជាមួយថ្នាក់ដឹកនាំធុរកិច្ចអាល្លឺម៉ង់ លោកស្រី von der Leyen បាននិយាយថា «យើងចង់ឈានដល់កិច្ចព្រមព្រៀងជាមួយប្រទេសឥណ្ឌានៅឆ្នាំនេះ» ដោយលោកស្រីបានបន្ថែមថា នាយករដ្ឋមន្ត្រីឥណ្ឌា Narendra Modi បានធានាចំពោះលោកស្រីនូវការប្តេជ្ញាចិត្តរបស់លោក ចំពោះគោលដៅនេះ អំឡុងការជជែកតាមទូរសព្ទ កាលពីថ្ងៃពុធ។ ហើយជាមួយគ្នានេះ លោកស្រីក៏បានឲ្យដឹងទៀតថា៖ «យើងកំពុងពិភាក្សាជាមួយអាហ្វ្រិកខាងត្បូង ម៉ាឡេស៊ី អេមីរ៉ាតអារ៉ាប់រួម និងប្រទេសដទៃទៀត»។

សេចកក្ដីរាយការណ៍ពីសារព័ត៌មាន Reuters បានឲ្យដឹងថា បើយោងតាមការសិក្សាពីវិទ្យាស្ថានសេដ្ឋកិច្ច IW របស់ប្រទេសអាល្លឺម៉ង់ បានបង្ហាញថា សហរដ្ឋអាមេរិកពឹងផ្អែកខ្លាំងលើការនាំចូលពី EU ពោលគឺច្រើនជាងការប៉ាន់ស្មានដោយទូទៅ ដោយប្លុកនេះបានវ៉ាដាច់ប្រទេសចិន ទាំងតម្លៃសរុប និងចំនួនទំនិញ។

ការពឹងផ្អែកនោះបានកើនឡើងយ៉ាងខ្លាំង ក្នុងរយៈពេល ១៥ឆ្នាំចុងក្រោយនេះ ដោយចំនួនក្រុមផលិតផលដែលយ៉ាងហោចណាស់ ៥០ភាគរយនៃការនាំចូលមកពី EU បានកើនឡើងដល់ជាង ៣.១០០មុខ កាលពីឆ្នាំមុន ពោលគឺច្រើនជាង ២.៦០០មុខ ក្នុងឆ្នាំ២០១០។ នេះបើយោងតាម IW។

ការរកឃើញនេះបង្ហាញថា ប្រធានគណៈកម្មការ EU លោកស្រី von der Leyen អាចមានប្រៀបកាន់តែខ្លាំង ក្នុងកិច្ចពិភាក្សាពន្ធគយជាមួយទីក្រុងវ៉ាស៊ីនតោន ជាអ្វីដែលបាននាំទៅដល់អត្រាមូលដ្ឋាន ១៥ភាគរយលើទំនិញភាគច្រើនរបស់ EU។

ឥណ្ឌា និង EU ហាក់ដូចជាឆ្ពោះទៅកាន់តែកៀកនឹងការបំពេញតាមពេលវេលាកំណត់ នៅដំណាច់ឆ្នាំនេះ ដែលត្រូវបញ្ចប់ការចរចាកិច្ចព្រមព្រៀងពាណិជ្ជកម្មសេរី (FTA)៕