អេមីរ៉ាត់អារ៉ាប់រួម (អារ៉ាប់រួម) អាចទម្លាក់ទំនាក់ទំនងការទូតជាមួយអ៊ីស្រាអែល ប្រសិនបើរដ្ឋាភិបាលរបស់លោកនាយករដ្ឋមន្ត្រី Benjamin Netanyahu បញ្ចូលជាដែនដីឧបសម្ព័ន្ធដោយផ្នែក ឬទាំងអស់នៃតំបន់ West Bank ដែលអ៊ីស្រាអែលកាន់កាប់។ នេះបើយោងតាមប្រភពចំនួន ៣ ដែលបានប្រាប់ព័ត៌មានឲ្យដឹង អំពីការពិភាក្សាសម្រេចរបស់រដ្ឋឈូងសមុទ្រអារ៉ាប់មួយនេះ។

អារ៉ាប់រួម គឺជារដ្ឋមួយក្នុងចំណោមរដ្ឋអារ៉ាប់មួយចំនួនដែលមានទំនាក់ទំនងការទូតជាមួយអ៊ីស្រាអែល ហើយការទម្លាក់ទំនាក់ទំនង នឹងប៉ះពាល់យ៉ាងខ្លាំងដល់កិច្ចព្រមព្រៀង Abraham ដែលជាសមិទ្ធិផលគោលនយោបាយការបរទេសដ៏សំខាន់បំផុតរបស់ប្រធានាធិបតីអាមេរិក លោក Donald Trump និងលោក Netanyahu។

រដ្ឋាភិបាលរបស់អ៊ីស្រាអែលនាពេលថ្មីៗនេះ បានចាត់វិធានការដែលអាចបង្ហើបពីការបញ្ចូលជាដែនដីឧបសម្ព័ន្ធនៃតំបន់ West Bank ដែលត្រូវបានដណ្ដើមកាន់កាប់រួមជាមួយទីក្រុងហ្សេរុយសាឡឹមខាងកើតក្នុងសង្រ្គាម នៅឆ្នាំ១៩៦៧។ អង្គការសហប្រជាជាតិ (UN) និងប្រទេសភាគច្រើនជំទាស់នឹងការធ្វើបែបនេះ។

នៅក្នុងខែកញ្ញា ទីក្រុង Abu Dhabi បានព្រមានក្រុមចម្រុះស្តាំនិយមរបស់លោក Netanyahu ថា ការបញ្ចូលជាដែនដីឧបសម្ព័ន្ធណាមួយនៃតំបន់ West Bank នឹងក្លាយជា «បន្ទាត់ក្រហម» សម្រាប់រដ្ឋឈូងសមុទ្រ ប៉ុន្តែមិនបាននិយាយថា តើអ្វីដែលជាវិធានការអាចត្រូវបានអនុវត្តនោះឡើយ។

ប្រភពបានប្រាប់សារព័ត៌មាន Reuters ថា អារ៉ាប់រួមដែលបានបង្កើតទំនាក់ទំនងជាមួយអ៊ីស្រាអែល ក្នុងឆ្នាំ២០២០ ក្រោមកិច្ចព្រមព្រៀង Abraham កំពុងពិចារណាដកឯកអគ្គរដ្ឋទូតរបស់ខ្លួន ដើម្បីជាការឆ្លើយតបណាមួយ។

តែយ៉ាងណាក្ដី ប្រភពទាំងនោះដែលបាននិយាយក្នុងលក្ខខណ្ឌមិនបញ្ចេញឈ្មោះ បានប្រាប់ថា ទីក្រុង Abu Dhabi មិនកំពុងពិចារណាផ្តាច់ទំនាក់ទំនងទាំងស្រុងនោះទេ បើទោះបីជាភាពតានតឹង បានកើនឡើងក្នុងអំឡុងពេលមានសង្គ្រាមហ្កាហ្សាជិត ២ឆ្នាំនេះក៏ដោយ៕