​សហរដ្ឋអាមេរិក៖ សហរដ្ឋអាមេរិក​បាន​ជំរុញ​ប្រទេស​ចិន​ឲ្យ​ប្រើ​ឥទ្ធិពល​របស់​ខ្លួន​ជាមួយ​រុស្ស៊ី ដើម្បី​ទប់​កុំ​ឲ្យ​ចូល​ឈ្លា​ន​ពាន​អ៊ុយ​ក្រែ​ន​។ ​មន្ត្រី​ថ្នាក់​ទី​៣ របស់​ក្រសួងការបរទេស​អាមេរិកលោកស្រី Victoria Nuland បាន​ប្រាប់​ក្រុម​អ្នកសារ​ព័ត៌មាន​កាលពី​ថ្ងៃ​ព្រហស្បតិ៍​ថា យើង​កំពុង​អំពាវនាវ​ដល់​ទី​ក្រុង​ប៉េកាំងឲ្យ​ប្រើ​ឥទ្ធិពល​របស់​ខ្លួន​ជាមួយ​ទីក្រុង​មូ​ស្គូ ដើម្បី​ប្រើ​ការទូត ប្រសិនបើ​មាន​ជម្លោះ​ក្នុង​ប្រទេស​អ៊ុយ​ក្រែ​ន ហើយ​បើ​មានការឈ្លានពាន​ពិតមែន​នោះ​វា​ក៏​មិនល្អ​សម្រាប់​ប្រទេស​ចិនដែរ​។

​លោកស្រី Nuland ក៏បាន​និយាយ​ផង​ដែរ​ថា សហរដ្ឋអាមេរិក​ជឿ​ជាក់​ថា ​ប្រទេស​អាល្លឺម៉ង់​នឹង​មិន​បើក​ប្រព័ន្ធ​បង្ហូរ​ឧស្ម័ន Nord Stream 2 ជាមួយ​ប្រទេស​រុស្ស៊ី ប្រសិនបើ​ទីក្រុង​ម៉ូស្គូ​ឈ្លានពាន​អ៊ុយ​ក្រែ​ន​។ ​លោកស្រី​ថា បើ​រុស្ស៊ីឈ្លានពាន​អ៊ុយ​ក្រែ​ននោះប្រព័ន្ធ​បង្ហូរ​ឧស្ម័ន Nord Stream 2 នឹងមិន​បើកចំហជាដាច់ខាត​។ ​ក្នុងពេល​ប៉ុន្មាន​ថ្ងៃ​ថ្មីៗ​នេះទីក្រុង Washington បាន​លើកឡើងថា ឥទ្ធិពល​របស់​ក្រុង​ប៉េកាំងអាច​ដើរតួនាទី​ក្នុងការ​ទប់ទល់​នឹង​លទ្ធភាព​ នៃ​ការឈ្លានពាន​របស់​រុស្ស៊ី​ទៅលើ​អ៊ុយ​ក្រែ​ន​។​ ​អនុរដ្ឋមន្ត្រី​ការបរទេស​សហរដ្ឋអាមេរិកលោកស្រី Wendy Sherman បានបង្ហាញ​សញ្ញាកាលពី​ថ្ងៃ​ពុធ​ថា ព្រឹត្តិការណ៍​អន្តរជាតិ​របស់​ចិនគឺ​កីឡា​អូឡាំពិក​រដូវរងា​ក្រុង​ប៉េកាំង​ឆ្នាំ​២០២២ ប្រហែលជា​អាច​បង្អាក់​ពេលវេលា​នៃ​ការឈ្លានពាន​របស់​រុស្ស៊ី​បាន៕

អត្ថបទ៖ សុខមាន