អង្គការសហប្រជាជាតិ(UN) បានព្រមានថា បម្រែបម្រួលអាកាសធាតុ បានធ្វើឲ្យវដ្តទឹកនៅលើផែនដី កាន់តែខុសប្រក្រតី បណ្តាលឲ្យកើតមានភាពខុសប្លែកគ្នាខ្លាំងរវាងការជន់លិច និងគ្រោះរាំងស្ងួតនៅទូទាំងពិភពលោក ។

អង្គការឧតុនិយមពិភពលោក(WMO) របស់ UN បាននិយាយនៅក្នុងរបាយការណ៍បញ្ចេញនាថ្ងៃព្រហស្បតិ៍នេះថា វដ្តទឹកសកល ពុំអាចព្យាករដឹងមុនកាន់តែខ្លាំង ក្នុងនោះការប្រេះផ្ទាំងទឹកកក គ្រោះរាំងស្ងួត បាសាំងទន្លេពុំមានតុល្យភាព និងទឹកជំនន់ធ្ងន់ធ្ងរ បានបង្កភាពវឹកវរកាន់តែខ្លាំង ។

លោក Celeste Saulo គឺជាប្រធានអង្គការ WMOនិយាយនៅក្នុងសេចក្តីថ្លែងការណ៍ថា ធនធានទឹកពិភពលោក ស្ថិតក្រោមសម្ពាធកើនឡើង ហើយក្នុងពេលតែមួយនេះ គ្រោះថ្នាក់ពាក់ព័ន្ធនឹងទឹក បង្កផលប៉ះពាល់កើនឡើងដល់ជីវិតមនុស្ស និងការរស់នៅប្រចាំថ្ងៃរបស់ពួកគេ ។

ក្រុមអ្នកវិទ្យាសាស្រ្តអន្តរជាតិ បានវាយតម្លៃលទ្ធភាពទឹកសាប និងការស្តុកទឹកនៅទូទាំងពិភពលោក រួមទាំងទឹកបឹង ទឹកទន្លេ ទឹកក្រោមដី សំណើមដី ព្រិលធ្លាក់ និងការរលាយទឹកកក ។

កាលពីឆ្នាំមុន គឺជាឆ្នាំក្តៅបំផុតជាប់កំណត់ត្រា នាំឲ្យមានគ្រោះរាំងស្ងួតរយៈពេលយូរ ក្នុងតំបន់ជាច្រើននៅអាមេរិកខាងត្បូង តំបន់បាសាំងព្រៃជប់ភ្លៀងអាម៉ាហ្សូន និងនៅអាហ្វ្រិកខាងត្បូង ។

របាយការណ៍រកឃើញទៀតថា តំបន់ជាច្រើននៅអាហ្វ្រិកកណ្តាល អឺរ៉ុប អាស៊ី ជួបអាកាសធាតុសើមខុសពីធម្មតា ដោយរងការវាយប្រហារពីទឹកជន់ និងព្យុះស្លាប់មនុស្ស ៕