នៅច្រកព្រំដែន Islam Qala ខ្យល់បក់ឥតឈប់ឈរធ្វើឲ្យហុយធូលីលើពលរដ្ឋអាហ្វហ្គានីស្ថានធ្វើមាតុភូមិនិវត្តន៍មកកាន់ប្រទេសរបស់ខ្លួន ស្របពេលដែលសីតុណ្ហោភាពកើនឡើងដល់ ៤០អង្សាសេ ។

គ្រួសារអាហ្វហ្គានីស្ថានទាំងនេះ នាំគ្នារកកន្លែងជ្រកក្រោមម្លប់ ក្នុងនោះក្មេងៗនាំគ្នាយកក្រមារុំមុខរបស់ពួកគេ ខណៈរង់ចាំជំនួយ ។ សម្រាប់ពលរដ្ឋទាំងនេះ វាគឺជាការលំបាកមួយ ក្រោយនិរទេសអស់រយៈពេលជាច្រើនឆ្នាំ ។

ចាប់តាំងពីខែកញ្ញា ឆ្នាំ ២០២៣មក ពលរដ្ឋអាហ្វហ្គានីស្ថានជាង ៤លាននាក់ បានវិលត្រឡប់មកពីប្រទេសអ៊ីរ៉ង់ និងប្រទេសប៉ាគីស្ថាន ក្នុងនោះពួកគេ ១,៥លាននាក់ បានវិលត្រឡប់មកកាន់ប្រទេសកំណើតវិញក្នុងឆ្នាំ ២០២៥នេះ ។

ក្នុងពេលតែមួយនេះដែរ ទិន្នន័យពីអង្គការអន្តោប្រវេសន៍អន្តរជាតិ (IOM) បង្ហាញថា ពលរដ្ឋអាហ្វហ្គានីស្ថានជិត ៣៥ម៉ឺននាក់ ត្រូវបានជម្លៀសខ្លួននៅក្នុងរយៈពេល ៤ខែដំបូងនៅឆ្នាំ ២០២៥នេះ រួមទាំងការជម្លៀសខ្លួនក្នុងប្រទេស និងការធ្វើអន្តោប្រវេសន៍ឆ្លងកាត់ព្រំដែន ។

ការជម្លៀសខ្លួនទ្រង់ទ្រាយធំនេះ បង្កជាចំបងដោយសារស្ថានភាពសេដ្ឋកិច្ចកាន់តែធ្ងន់ធ្ងរខ្លាំង និងផលប៉ះពាល់កើនឡើងបណ្តាលមកពីបម្រែបម្រួលអាកាសធាតុ ។

នៅប្រទេសអ៊ីរ៉ង់ ពលរដ្ឋអាហ្វហ្គានីស្ថានមិនមែនជាកម្មករអចិន្រ្តៃយ៍ ពួកគេចាំបាច់សម្រាប់សេដ្ឋកិច្ច ធ្វើការក្នុងវិស័យសំណង់ កសិកម្ម និងផលិតកម្ម ។ ការចាកចេញរបស់ពួកគេបង្កើតឲ្យមានគំលាតដ៏សំខាន់មួយនៅក្នុងកម្លាំងការងារអ៊ីរ៉ង់ ខណៈអ្នកដែលវិលត្រឡប់មកវិញ ប្រឈមនឹងអនាគតពុំច្បាស់លាស់នៅក្នុងប្រទេសអាហ្វហ្គានីស្ថាន ៕