លោក Donald Trump បានព្រមានថា ប្រធានាធិបតីរុស្ស៊ី លោក Vladimir Putin ពិតជាធ្វើឱ្យរូបលោកខកចិត្ត បន្ទាប់ពីលោកបានជួបនាយករដ្ឋមន្រ្តី Keir Starmer នៅថ្ងៃចុងក្រោយនៃដំណើរទស្សនកិច្ចផ្លូវរដ្ឋជាប្រវត្តិសាស្ត្ររបស់ប្រធានាធិបតីសហរដ្ឋអាមេរិក រូបនេះ នៅចក្រភពអង់គ្លេស។

មួយថ្ងៃបន្ទាប់ពីព្រះមហាក្ស Charles បានអញ្ជើញលោកឲ្យចូលរួមកម្មវិធីស្វាគមន៍ដ៏អធិកអធមនៅព្រះបរមរាជរាំង Windsor Castle លោក Trump បានបង្ហាញខ្លួននៅក្នុងសន្និសីទសារព័ត៌មានរួមគ្នាជាមួយលោក Starmer ហើយបានលើកសរសើរចក្រភពអង់គ្លេស និងរិះគន់មេដឹកនាំផ្សេងទៀត ទោះបីជាលោកបានលើកឡើងថាមេដឹកនាំចក្រភពអង់គ្លេសអាចប្រើយោធាដើម្បីទប់ស្កាត់អន្តោប្រវេសន៍ក៏ដោយ។      

ទន្ទឹមនឹងនោះ លោក Starmer បានជំរុញលោក Trump ជួយលើជម្លោះអ៊ុយក្រែន និងបានអំពាវនាវឱ្យមានសម្ពាធបន្ថែមលើលោក Putin ខណៈលោកព្យាយាមភ្ជាប់ទំនាក់ទំនងរវាងលោក Trump និងសម្ព័ន្ធមិត្តអឺរ៉ុប លើបញ្ហាទីក្រុង Kyiv ។   

លោក Trump ដែលមានមិត្តភាពជាយូរមកហើយជាមួយនឹងលោក Putin នោះបានស្តីបន្ទោសទៅកាន់មេដឹកនាំរុស្ស៊ីរូបនេះ ចំពោះការបន្តសង្រ្គាម។

លោក Trump បាននិយាយថា អ្វីដែលលោកគិតថាងាយស្រួលបំផុត គឺដោយសារតែទំនាក់ទំនងរបស់លោកជាមួយប្រធានាធិបតី Putin ប៉ុន្តែមេដឹកនាំរុស្ស៊ី បានធ្វើឱ្យលោកខកចិត្តខ្លាំងណាស់។

លោកបានជំរុញឲ្យបណ្តាប្រទេសនៅអឺរ៉ុបឈប់ទិញប្រេងពីរុស្ស៊ីដោយនិយាយថា ប្រសិនបើតម្លៃប្រេងធ្លាក់ចុះ នោះម៉ាស៊ីនសង្គ្រាមរបស់លោក Putin ក៏នឹងចុះខ្សោយដែរ៕