ប្រធានាធិបតីអាមេរិក លោក Donald Trump ត្រូវបានរំពឹងថានឹងជួបពិភាក្សាតាមទូរសព្ទជាមួយមេដឹកនាំចិន លោក Xi Jinping នៅថ្ងៃសុក្រ (១៩ កញ្ញា) នេះ ក្នុងការជំរុញមួយដើម្បីផ្ដល់ភាពផ្លូវការដល់កិច្ចព្រមព្រៀង TikTok ដើម្បីអនុញ្ញាតឱ្យកម្មវិធីប្រព័ន្ធផ្សព្វផ្សាយសង្គមដ៏ពេញនិយមមួយនេះ អាចបន្តប្រតិបត្តិការបាននៅសហរដ្ឋអាមេរិក។

កិច្ចសន្ទនានេះក៏អាចផ្តល់នូវតម្រុយខ្លះៗអំពីថា តើមេដឹកនាំទាំងពីររូបអាចជួបទល់មុខគ្នាដោយផ្ទាល់ដើម្បីសម្រេចកិច្ចព្រមព្រៀងចុងក្រោយក្នុងការបញ្ចប់សង្គ្រាមពាណិជ្ជកម្មរបស់ប្រទេសទាំងពីរដែរឬទេ ហើយក៏អាចផ្តល់ភាពច្បាស់លាស់ពីជំហរអនាគតនៃទំនាក់ទំនងរវាងមហាអំណាចទាំងពីរផងដែរ។

កិច្ចពិភាក្សានេះក៏នឹងក្លាយជាជំនួបទូរសព្ទលើកទីពីរហើយជាមួយលោក Xi ចាប់តាំងពីលោក Trump ត្រលប់ទៅអង្គុយកៅអីសេតវិមានវិញ ហើយបានចាប់ផ្តើមការដំឡើងពន្ធខ្ពស់លើចិន ដែលបង្កឱ្យមានការរឹតបន្តឹងពាណិជ្ជកម្មទៅវិញទៅមក ហើយក៏ធ្វើឱ្យទំនាក់ទំនងរវាងប្រទេសមានសេដ្ឋកិច្ចធំជាងគេទាំងពីរមានភាពរកាំរកូស។ ទោះយ៉ាងនេះក្ដី លោក Trump តែងបង្ហាញពីឆន្ទៈក្នុងការចរចាកិច្ចព្រមព្រៀងពាណិជ្ជកម្មជាមួយទីក្រុងប៉េកាំង ជាពិសេសសម្រាប់វេទិកាវីដេអូសង្គម TikTok ដែលប្រឈមនឹងបម្រាមរបស់អាមេរិក លុះត្រាតែក្រុមហ៊ុនមេ ByteDance របស់ចិន លក់ភាគហ៊ុនគ្រប់គ្រងរបស់ខ្លួនទៅឱ្យម្ចាស់ថ្មីជនជាតិអាមេរិក។

ស្ថានទូតចិននៅទីក្រុងវ៉ាស៊ីនតោន កាលពីថ្ងៃព្រហស្បតិ៍ មិនបានបញ្ជាក់ពីជំនួបទូរសព្ទ ឬកិច្ចប្រជុំកំពូលណាមួយនាពេលខាងមុខរវាងមេដឹកនាំទាំងពីរទេ ប៉ុន្តែអ្នកនាំពាក្យស្ថានទូត លោក Liu Pengyu បាននិយាយថា "ការទូតរបស់ប្រមុខរដ្ឋ ដើរតួនាទីមិនអាចជំនួសបាន ក្នុងការផ្តល់សេចក្ដីណែនាំជាយុទ្ធសាស្ត្រសម្រាប់ទំនាក់ទំនងចិន-អាមេរិក"។ ទាក់ទងនឹងលទ្ធភាពនៃកិច្ចពិភាក្សានេះ លោកស្រី Sun Yun នាយកកម្មវិធីចិននៅមជ្ឈមណ្ឌលស្រាវជ្រាវ Stimson មានមូលដ្ឋាននៅទីក្រុងវ៉ាស៊ីនតោន បានព្យាករពីលទ្ធផលនៃកិច្ចពិភាក្សាជាវិជ្ជមាន៕