សហរដ្ឋអាមេរិក កាលពីថ្ងៃព្រហស្បតិ៍ (១៨ កញ្ញា) បានប្រើសិទ្ធិវេតូជាថ្មីម្តងទៀតក្នុងការបោះឆ្នោតលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឱ្យមានបទឈប់បាញ់នៅតំបន់ហ្កាហ្សា ហើយក៏ទាមទារឱ្យអ៊ីស្រាអែល ដកការរឹតត្បិតទាំងអស់លើការផ្តល់ជំនួយដល់ទឹកដីប៉ាឡេស្ទីននេះ នៅក្នុងជំហានមួយមានបំណងការពារសម្ព័ន្ធមិត្តអ៊ីស្រាអែលរបស់ខ្លួន ពីសម្ពាធការទូត។

សមាជិក ១៤រូបផ្សេងទៀតនៃក្រុមប្រឹក្សា បានគាំទ្រសេចក្ដីសម្រេចនេះ ដែលផ្តួចផ្តើមឡើងក្នុងខែសីហាកន្លងទៅ ដើម្បីឆ្លើយតបនឹងការប្រកាសជាផ្លូវការរបស់អង្គការសហប្រជាជាតិ ពីគ្រោះទុរ្ភិក្សក្នុងដែនដីប៉ាឡេស្ទីនដ៏តូចចង្អៀតនេះ បន្ទាប់ពីរយៈពេលជិត ២ឆ្នាំនៃសង្រ្គាមរបស់អ៊ីស្រាអែល លើក្រុមហាម៉ាស។

សេចក្ដីរាយការណ៍និយាយថា អត្ថបទសេចក្ដីសម្រេចនោះបានទាមទារ "បទឈប់បាញ់ជាបន្ទាន់ គ្មានលក្ខខណ្ឌ និងជាអចិន្ត្រៃយ៍នៅហ្កាហ្សា ដែលគ្រប់ភាគីត្រូវតែគោរព" ក៏ដូចជាការដោះលែងចំណាប់ថ្នូរជាបន្ទាន់ និងគ្មានលក្ខខណ្ឌ។ នេះជាលើកទី៦ហើយ ដែលអាមេរិកវេតូក្នុងក្រុមប្រឹក្សាសន្តិសុខ ជុំវិញសង្រ្គាមហ្កាហ្សា ដោយថ្មីៗបំផុតគឺក្នុងខែមិថុនា នៅពេលដែលខ្លួនប្រើសិទ្ធិវេតូដើម្បីគាំទ្រអ៊ីស្រាអែល។

ជាមួយគ្នានេះ នៅថ្ងៃព្រហស្បតិ៍ដដែលនោះ ទុក្ខវេទនារបស់ប្រជាជនប៉ាឡេស្ទីនមិនបានធូរស្បើយឡើយ ដោយរថក្រោះ និងយន្តហោះចម្បាំងអ៊ីស្រាអែល បានបន្តទម្លាក់គ្រាប់បែកលើទីក្រុងហ្កាហ្សា ដែលជាគោលដៅនៃយុទ្ធនាការជើងគោកដ៏សំខាន់មួយ ដោយរុញច្រានអ្នកស្រុកឱ្យរត់ភៀសខ្លួនចេញទៅភាគខាងត្បូង។ ក្រុមអ្នកកាសែត និងសាក្សីនៅទីនោះ បានមើលឃើញលំហូរដ៏ច្រើនសន្ធឹកនៃពលរដ្ឋហ្កាហ្សា រត់ឆ្ពោះទៅទិសខាងត្បូងដោយថ្មើរជើង ឬយានជំនិះ និងរទេះសត្វលាជាដើម៕