ប្រដាល់៖ សហព័ន្ធកីឡាប្រដាល់គុនខ្មែរបានសម្រេចពន្យារពេល រៀបចំការប្រកួតជ្រើសរើសជើងឯកថ្នាក់ជាតិឆ្នាំ២០២១ ដែលគ្រោងរៀបចំនាចុងខែមករានេះទៅរៀបចំនាពាក់កណ្ដាលខែកុម្ភៈ ឆ្នាំ២០២២ ខាងមុខវិញ។
យោងតាមសេចក្ដីជូនដំណឹងរបស់សហព័ន្ធបានឲ្យដឹងថា ជើងឯកថ្នាក់ជាតិនេះដំបូងឡើងគ្រោងរៀបចំការប្រកួតពីថ្ងៃទី២៤ ដល់ថ្ងៃទី២៩ ខែមករា ឆ្នាំ២០២២ នេះ តាមគោលការណ៍របស់ក្រសួងអប់រំ យុវជន និងកីឡា តែដោយសារលក្ខណៈបច្ចេកទេស សហព័ន្ធបានសម្រេចលើកពេលទៅរៀបចំការប្រកួតពីថ្ងៃទី១៤ ដល់ថ្ងៃទី១៨ ខែកុម្ភៈខាងមុខវិញ។ តាមរយៈនេះ សហព័ន្ធបានអនុញ្ញាតឲ្យគ្រប់បណ្ដាស្ថានីយទាំងអស់ដែលសហព័ន្ធតម្រូវឲ្យផ្អាកការប្រកួតកាលពីថ្មីៗ អាចដំណើរការរៀបចំការប្រកួតឡើងវិញបាន តែគ្រប់សង្វៀនតាមស្ថានីយទូរទស្សន៍ត្រូវផ្អាកការប្រកួតវិញចាប់ពីថ្ងៃទី១១ ដល់ថ្ងៃទី១៣ ខែកុម្ភៈ ដើម្បីជាការសហការ និងផ្ដល់លទ្ធភាពដល់សហព័ន្ធក្នុងការរៀបចំការប្រកួតជ្រើសរើសជើងឯកថ្នាក់ជាតិប្រចាំឆ្នាំ២០២១ ឲ្យទទួលបានជោគជ័យ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
