អាជ្ញាធរប្រទេសអ៊ុយក្រែនបាននិយាយថា ប្រទេសរុស្ស៊ី និងអ៊ុយក្រែនបានដោះដូរសាកសពទាហានជាង ១.០០០នាក់ដែលបានស្លាប់ក្នុងសមរភូមិ។ សាកសពភាគច្រើនត្រូវបានទទួលដោយអ៊ុយក្រែនពីរុស្ស៊ី ខណៈសាកសពទាហានរុស្ស៊ី២៤នាក់ត្រូវបានប្រគល់ឲ្យដោយភាគីអ៊ុយក្រែន។

ទីបញ្ជាការសម្របសម្រួលសម្រាប់អ្នកទោសសង្គ្រាមបាននិយាយនៅលើបណ្តាញ Telegram កាលពីថ្ងៃព្រហស្បតិ៍ថា «វិធានការប្រគល់សាកសពបានធ្វើឡើងនៅថ្ងៃនេះ ដោយសាកសពចំនួន១.០០០នាក់ ដែលយោងតាមភាគីរុស្ស៊ីបានឲ្យដឹងថាជាទាហានអ៊ុយក្រែន ត្រូវបានប្រគល់ទៅឲ្យអ៊ុយក្រែនវិញ»។

ចាប់តាំងពីសង្រ្គាមរវាងអ៊ុយក្រែននិងរុស្ស៊ី ចាប់ផ្តើមនៅក្នុងខែកុម្ភៈ ឆ្នាំ២០២២ ការប្រគល់សាកសពទាហាន និងការដោះដូរឈ្លើយសឹក គឺជាផ្នែកតែមួយគត់នៃកិច្ចសហប្រតិបត្តិការរវាងប្រទេសទាំងពីរ។

ការដោះដូរសាកសពត្រូវបានសម្របសម្រួលដោយគណៈកម្មាធិការកាកបាទក្រហមអន្តរជាតិ នេះបើយោងតាមគម្រោងរបស់អ៊ុយក្រែនមានឈ្មោះថា «ខ្ញុំចង់ស្វែងរក» ។ ទាហានរាប់ម៉ឺននាក់ ត្រូវបានសម្លាប់នៅភាគីទាំងសងខាងចាប់តាំងពីការឈ្លានពានរបស់រុស្ស៊ី។ ទោះជាយ៉ាងណា ទាំងទីក្រុងគីវ និងទីក្រុងមូស្គូ ពុំបានផ្សព្វផ្សាយទិន្នន័យអំពីអ្នកស្លាប់និងរងរបួសផ្ទាល់ខ្លួនជាទៀងទាត់នោះទេ។