នាយករដ្ឋមន្ត្រីប្រទេសលីបង់ លោក Nawaf Salam បានថ្កោលទោសការវាយប្រហារតាមអាកាសរបស់អ៊ីស្រាអែលលើទីក្រុងចំនួនបីនៅភាគខាងត្បូងប្រទេស ខណៈបានរំលោភបទឈប់បាញ់ជាមួយក្រុមហេសបូឡាម្តងទៀត ។

ទីភ្នាក់ងារសារព័ត៌មានរដ្ឋរបស់ប្រទេសលីបង់ បានរាយការណ៍កាលពីថ្ងៃព្រហស្បតិ៍ថា កងទ័ពអ៊ីស្រាអែលបានវាយប្រហារជាច្រើនលើកទៅលើទីក្រុងមានប្រជាជនរស់នៅច្រើន ដែលត្រូវបានអនុវត្តត្រឹមតែមួយម៉ោងក្រោយការប្រកាសផែនការដើម្បីកំណត់គោលដៅលើហេដ្ឋារចនាសម្ព័ន្ធរបស់ក្រុមហេសបូឡា។

លោក Salam បានចោទប្រកាន់អ៊ីស្រាអែលពីបទ «បំភិតបំភ័យ និងឈ្លានពាន» ដែលបានប្រព្រឹត្តក្នុងការផ្គើនទៅនឹងបទឈប់បាញ់កាលពីឆ្នាំមុន និងយន្តការដែលគាំទ្រដោយអន្តរជាតិដើម្បីតាមដានបទឈប់បាញ់។

លោក Salam បាននិយាយនៅក្នុងការបង្ហោះលើបណ្តាញផ្សព្វផ្សាយសង្គមថា «ប្រទេសលីបង់ អំពាវនាវឱ្យសហគមន៍អន្តរជាតិ ជាពិសេសបណ្តាប្រទេសដែលជួយដល់កិច្ចព្រមព្រៀងដើម្បីបញ្ឈប់ប្រតិបត្តិការអរិភាព ដោយដាក់សម្ពាធអតិបរមាលើអ៊ីស្រាអែលឱ្យបញ្ឈប់ការឈ្លានពានរបស់ខ្លួនជាបន្ទាន់»។

ប្រទេសបារាំង និងសហរដ្ឋអាមេរិក គឺជាអ្នកផ្តល់ជំនួយធំក្នុងកិច្ចព្រមព្រៀងនេះ។ កាលពីពេលមុននេះ យោធាអ៊ីស្រាអែលបានប្រកាសពីការវាយប្រហារតាមផែនការលើ «ហេដ្ឋារចនាសម្ព័ន្ធយោធា» របស់ក្រុមហេសបូឡា ហើយបានអំពាវនាវឱ្យអ្នកស្រុកជម្លៀសខ្លួនចេញពីអគារដែលមានសញ្ញាពណ៌ក្រហមនៅលើផែនទីដែលបានភ្ជាប់។