ប្រធានជំនួយរបស់អង្គការសហប្រជាជាតិ លោក Tom Fletcher បានសម្ដែងក្ដីសង្ឃឹមថា ស្ថាប័នពិភពលោកមួយនេះ នឹងប្រយុទ្ធប្រឆាំងនឹង "ការវាយប្រហារប្រកបដោយនិរន្តរភាព" លើគុណតម្លៃ និងហិរញ្ញវត្ថុរបស់ខ្លួននៅសប្តាហ៍ក្រោយ នៅឯការជួបជុំប្រចាំឆ្នាំរបស់មេដឹកនាំពិភពលោក ហើយនិយាយថា អន្តរជាតិត្រូវប្រឹងប្រែងឱ្យកាន់តែខ្លាំង ខណៈក្រុមមនុស្សធម៌មិនអាចរង់ចាំសហរដ្ឋអាមេរិក ស្តារមូលនិធិជំនួយរបស់ខ្លួនវិញបានទេ។

ទិន្នន័យរបស់អង្គការសហប្រជាជាតិបង្ហាញថា ការស្លាប់របស់បុគ្គលិកជំនួយកើនឡើងជិតមួយភាគបីដល់តួលេខប្រមាណជិត ៤០០នាក់ កាលពីឆ្នាំមុន ជាឆ្នាំដែលមានការស្លាប់បុគ្គលិកជំនួយយច្រើនបំផុតចាប់តាំងពីកំណត់ត្រាចាប់ផ្តើមក្នុងឆ្នាំ១៩៩៧មក។ បន្ទាប់មកក្នុងខែមករា ប្រធានាធិបតីអាមេរិក លោក Donald Trump បានវិលត្រឡប់មកកាន់អំណាចវិញ ហើយបានកាត់ជំនួយបរទេសរបស់អាមេរិក ដែលបង្កឱ្យមានភាពចលាចលផ្នែកមនុស្សធម៌ជាសកល។

លោក Fletcher បានប្រាប់សារព័ត៌មានរ៉យទ័រក្នុងបទសម្ភាសន៍មួយកាលពីថ្ងៃព្រហស្បតិ៍ (១៨ កញ្ញា) ថា "នោះជាឆ្នាំដ៏លំបាកមួយ" ដោយបន្ថែមថា អង្គការសហប្រជាជាតិគួរតែបង្ហាញមេដឹកនាំពិភពលោក អំពីមធ្យោបាយដែលអាចជួយសង្គ្រោះជីវិតមនុស្សបាន និងប្រឹងប្រែងដើម្បីបញ្ចប់ជម្លោះ។ ប្រមុខជំនួយ UN រូបនេះនៅតែសង្ឃឹមថា ទីក្រុងវ៉ាស៊ីនតោន ដែលជាម្ចាស់ជំនួយមនុស្សធម៌ដ៏ធំបំផុតរបស់ពិភពលោក អាចស្តារ និងបន្តការផ្តល់មូលនិធិមួយចំនួនរបស់ខ្លួនឡើងវិញ "ប៉ុន្តែក្នុងពេលជាមួយគ្នានេះ គ្រប់គ្នាមិនអាចអង្គុយរង់ចាំមើលបានទេ"។

រដ្ឋបាលលោក Trump បានកាត់បន្ថយជំនួយបរទេសរាប់ពាន់លានដុល្លារ ដែលខ្លួនជឿថាមិនស្របតាមគោលនយោបាយការបរទេស "យកអាមេរិកជាធំ" របស់ខ្លួន។ លោក Trump ក៏បាននិយាយដែរថា សហរដ្ឋអាមេរិកចំណាយប្រាក់មិនស្មើភាពឡើយលើជំនួយបរទេស ហើយចង់ឱ្យប្រទេសផ្សេងទៀតជួយរ៉ាប់រងបន្ទុកបន្ថែមទៀត៕