​សហរដ្ឋអាមេរិក៖ សេត​វិមាន​និយាយថា លោក​ប្រធានាធិបតី​សហរដ្ឋអាមេរិក Joe Biden បាន​ព្រមាន​ប្រធានាធិបតី​អ៊ុយ​ក្រែ​ន​ថា ​មាន​តម្រុយ​ថាប្រទេស​រុស្ស៊ីអាច​ចាត់វិធានការ​យោធា​លើ​អ៊ុយ​ក្រែ​ននៅ​ក្នុង​ខែ​កុម្ភៈ​ខាង​មុខ​នេះ ខណៈ​ដែល​សហរដ្ឋអាមេរិក​បាន​ព្យាយាម​រៀបចំជំនួប​ដោយ​បើក​ចំហ​ នៅ​ក្រុមប្រឹក្សាសន្តិសុខ​អង្គការសហប្រជាជាតិដើម្បី​ពិភាក្សា​ពី​វិបត្តិ​នេះ​។

​ដំណឹង​នេះ​កើតមានឡើង ខណៈ​វិមាន​ប្រធានាធិបតី​ក្រឹម​ឡាំង​បាន​បង្ហាញ​គូស​បញ្ជាក់​ ពី​ស្ថានភាព​កាលពី​ថ្ងៃ​ព្រហស្បតិ៍ដោយ​និយាយថា ខ្លួន​បាន​មើល​ឃើញ​សុទិដ្ឋិនិយម​តិចតួច​ក្នុង​ការ​ដោះស្រាយ​វិបត្តិ​ បន្ទាប់ពី​សហរដ្ឋអាមេរិក​បាន​ទាត់ចោល​ជាថ្មីនូវ​ការទាមទារ​របស់​រុស្ស៊ីនៅ​សប្ដាហ៍​នេះ​។ ​ក្រុម​មន្ត្រី​រុស្ស៊ី​បាន​និយាយ​ថា​ ទ្វារ​សម្រាប់​ការ​សន្ទនា​នៅតែ​បើកដើម្បី​ឈានទៅរក​ការបញ្ចប់​វិបត្តិ​នេះ ប៉ុន្តែលោក Biden បានចេញ​ការព្រមាន​ធ្ងន់ៗ​ជាថ្មី​ម្ដងទៀត ស្របពេល​ក្ដីបារម្ភ​ចេះតែ​កើនឡើង​ដែលថា ប្រធានាធិបតី​រុស្ស៊ី Vladimir Putin នឹង​បើកភ្លើង​ខៀវ​ឲ្យ​ឈ្លានពាន​អ៊ុយ​ក្រែ​នក្នុងពេល​ដ៏​ខ្លី​ខាងមុខនេះ​។ ​អ្នកនាំពាក្យ​ក្រុមប្រឹក្សាសន្តិសុខ​ជាតិ​របស់​សេត​វិមានលោកស្រី Emily Horne បាន​និយាយថា លោក​ប្រធានាធិបតី Biden បាន​និយាយថា មាន​តម្រុយ​ដែលថា​ រុស្ស៊ី​អាច​ឈ្លានពាន​អ៊ុយ​ក្រែ​ន​នៅ​ខែកុម្ភៈ៕

អត្ថបទ៖ សុខមាន