កងនាវាមុជទឹកទីក្រុងមូស្គូ បាននិយាយនៅថ្ងៃសុក្រ (១៩ កញ្ញា) នេះថា នាវាមុជទឹកដើរដោយថាមពលនុយក្លេអ៊ែរចំនួន ២គ្រឿងនៃកងនាវាប៉ាស៊ីហ្វិករបស់រុស្ស៊ី បានបាញ់បង្ហោះមីស៊ីលតម្រង់គោលដៅដោយជោគជ័យ ក្នុងអំឡុងពេលធ្វើសមយុទ្ធកងទ័ពជើងទឹកនៅសមុទ្រ អូខុតស្ក៍ (Okhotsk)។

សេវាសារព័ត៌មានរបស់កងនាវារុស្ស៊ី បាននិយាយក្នុងសេចក្តីថ្លែងការណ៍មួយថា នាវាមុជទឹកពហុគោលបំណងឈ្មោះ Krasnoyarsk និង Omsk បានបាញ់មីស៊ីលតម្រង់គោលដៅប្រភេទ Oniks និង Granit ទៅកាន់គោលដៅសមុទ្រដែលបានកំណត់ មានចម្ងាយជាង ២៥០គីឡូម៉ែត្រ។ ទិន្នន័យតាមដានបង្ហាញថា មីស៊ីលទាំង ៣គ្រាប់ បានបាញ់ចំគោលដៅផ្ទាល់។ នាវាលើផ្ទៃសមុទ្រ និងអង្គភាពអាកាសចរណ៍កងទ័ពជើងទឹកនៃកងនាវាចរប៉ាស៊ីហ្វិក ក៏ត្រូវដាក់ពង្រាយដើម្បីការពារតំបន់សាកល្បង ក្នុងអំឡុងពេលសមយុទ្ធផងដែរ។

ការហ្វឹកហ្វឺនបាញ់មីស៊ីលនេះគឺជាផ្នែកមួយនៃសមយុទ្ធបញ្ជាការនិងបុគ្គលិក ដែលធ្វើឡើងដោយបញ្ជាការរួមនៃកងកម្លាំងនៅភាគឦសានរបស់រុស្ស៊ី ចាប់តាំងពីថ្ងៃទី១២ ខែកញ្ញា។ សមយុទ្ធបានផ្តោតលើការការពារផ្លូវសមុទ្រនៅភាគខាងជើងមហាសមុទ្រប៉ាស៊ីហ្វិក ក៏ដូចជាការការពារឆ្នេរនៃតំបន់ Kamchatka និង Chukotka និងទឹកដីកោះក្បែរនោះ។

កងនាវារុស្ស៊ីបន្ថែមថា សមយុទ្ធនេះត្រូវបានធ្វើឡើងក្រោមផែនការហ្វឹកហ្វឺនរបស់កងទ័ពជើងទឹករុស្ស៊ី ហើយជាដំណាក់កាលចុងក្រោយនៃការហ្វឹកហ្វឺនប្រយុទ្ធសម្រាប់រដូវក្តៅ៕