អង្គការសុខភាពពិភពលោក WHO បាននិយាយកាលពីថ្ងៃព្រហស្បតិ៍ (១៨ កញ្ញា) ថា ករណីឆ្លងមកពីការផ្ទុះឡើងនៃជំងឺ អេបូឡា (Ebola) មានចំនួន ៤៨ករណី ត្រូវបានបញ្ជាក់ នៅក្នុងសាធារណរដ្ឋប្រជាធិបតេយ្យកុងហ្គោ ហើយមនុស្សយ៉ាងតិច ៣១នាក់ បានស្លាប់ដោយសារជំងឺដ៏កំណាចនេះ។

ប្រធានអង្គការ WHO លោក Tedros Adhanom Ghebreyesus បានប្រាប់អ្នកសារព័ត៌មានពីទីស្នាក់ការកណ្តាលរបស់អង្គការសុខភាពពិភពលោកនៅទីក្រុងហ្សឺណែវថា៖ អស់ពេល ២សប្តាហ៍មកហើយចាប់តាំងពីរដ្ឋាភិបាលកុងហ្គោ បានប្រកាសពីការផ្ទុះឡើងនៃវីរុស អេបូឡា ហើយមកទល់ពេលនេះមាន ៤៨ករណី ត្រូវបានបញ្ជាក់ និងប្រហែលជាមានការស្លាប់ ៣១នាក់ ត្រូវបានរាយការណ៍។

ការផ្ទុះឡើងនៃជំងឺនេះគឺជាលើកទីមួយរបស់កុងហ្គោ ក្នុងរយៈពេល ៣ឆ្នាំ ហើយត្រូវបានប្រកាសកាលពីដើមខែកញ្ញានេះ។ ព្រៃត្រូពិកដ៏ក្រាស់ឃ្មឹករបស់កុងហ្គោ គឺជាជង្រុកធម្មជាតិសម្រាប់វីរុសអេបូឡានេះ ដែលបណ្តាលឱ្យមានអាការៈគ្រុនក្តៅ ឈឺខ្លួន និងរាគរូស ហើយវីរុសនេះអាចបន្តនៅក្នុងខ្លួនរបស់មនុស្សរស់ រហូតដល់រាប់ឆ្នាំ។

WHO និយាយថា វ៉ាក់សាំងអេបូឡា ដំបូង ៤០០ដូសប្រភេទ Ervebo ពីឃ្លាំងស្តុកសរុប ២.០០០ដូសរបស់ប្រទេសនេះ ត្រូវបញ្ជូនទៅតំបន់ Bulape ដែលជាចំណុចកណ្តាលនៃការផ្ទុះជំងឺ។ មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក CDC កាលពីថ្ងៃព្រហស្បតិ៍ បានចេញសេចក្តីណែនាំសុខភាព ដល់មន្ទីរសុខាភិបាលសាធារណៈនានា មន្ទីរពិសោធន៍គ្លីនិក និងបុគ្គលិកថែទាំសុខភាព ស្តីពីការផ្ទុះឡើងនៃជំងឺអេបូឡា នៅកុងហ្គោ៕