សារព័ត៌មាន Washington Post កាលពីថ្ងៃព្រហស្បតិ៍ (ទី១៨ ខែកញ្ញា) បានចុះផ្សាយថា ប្រធានាធិបតីអាមេរិក លោក Donald Trump បានបដិសេធមិនយល់ព្រមផ្តល់កញ្ចប់ជំនួយយោធាតម្លៃ ៤០០លានដុល្លារដល់កោះតៃវ៉ាន់ ក្នុងរយៈពេលប៉ុន្មានខែថ្មីៗនេះ ខណៈដែលកំពុងចរចា ជុំវិញបញ្ហាពាណិជ្ជកម្ម និងលទ្ធភាពនៃការមានកិច្ចប្រជុំកំពូល ជាមួយទីក្រុងប៉េកាំង។

ការសម្រេចនេះនឹងបង្ហាញពីការងាកចេញយ៉ាងខ្លាំងពីគោលនយោបាយរបស់សហរដ្ឋអាមេរិក ចំពោះកោះកាន់លទ្ធិប្រជាធិបតេយ្យមួយនេះ ដែលប្រឈមនឹងការគំរាមកំហែងឥតឈប់ឈរនៃការលុកលុយពីប្រទេសចិន។ តែមន្ត្រីសេតវិមានម្នាក់បានប្រាប់សារព័ត៌មាន Washington Post ថា ការសម្រេច ពាក់ព័ន្ធនឹងកញ្ចប់ជំនួយនេះ មិនទាន់បញ្ចប់ចុងក្រោយនៅឡើយទេ។

លោក Trump និងសមភាគីចិនរបស់ គឺលោក Xi Jinping គ្រោងនឹងជជែកគ្នានៅថ្ងៃសុក្រ (ទី១៩ ខែកញ្ញា) នេះ ដែលជាសន្ទនាតាមទូរសព្ទលើកទី២ របស់មេដឹកនាំទាំង២ ចាប់តាំងពីអ្នកនយាបាយរបស់បក្សសាធារណរដ្ឋវ័យ ៧៩ឆ្នាំរូបនេះ បានវិលត្រលប់ទៅគ្រប់គ្រងកៅអីសេតវិមានវិញ។ ការពិភាក្សាតាមទូរសព្ទ បានកើតឡើង ខណៈភាគីទាំង២ ស្វែងរកការសម្រុះសម្រួល លើបញ្ហាពន្ធ និងកិច្ចព្រមព្រៀងលើកម្មវិធីចែករំលែកវីដេអូ TikTok។

គួរបញ្ជាក់ថា បើទោះបីជាសហរដ្ឋអាមេរិក បានឈប់ទទួលស្គាល់កោះតៃវ៉ាន់ នៅចុងទសវត្សរ៍ឆ្នាំ១៩៧០ ដើម្បីបំពេញចិត្តរបស់ប្រទេសចិនក៏ដោយ ក៏ទីក្រុងវ៉ាស៊ីនតោននៅតែជាអ្នកគាំទ្រដ៏សំខាន់បំផុតរបស់ទីក្រុងតៃប៉ិ និងជាអ្នកផ្គត់ផ្គង់ជំនួយយោធាដ៏ធំបំផុតរបស់កោះស្វ័យគ្រប់គ្រងនេះ។

យ៉ាងណាក្ដី ចាប់តាំងពីលោក Trump ត្រលប់ទៅសេតវិមានវិញ ក្នុងខែមករា ភាពរំជើបរំជួលមានកាន់តែខ្លាំងឡើងនៅក្នុងទីក្រុងតៃប៉ិ ជុំវិញភាពរឹងមាំនៃទំនាក់ទំនង រវាងកោះតៃវ៉ាន់ និងសហរដ្ឋអាមេរិក និងឆន្ទៈរបស់ក្រុងវ៉ាស៊ីនតោន ក្នុងការការពារកោះនេះ ប្រសិនបើចិនសម្រេចវាយប្រហារ៕