ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃព្រហស្បតិ៍ (ទី១៨ ខែកញ្ញា) ថា បច្ចុប្បន្ន ទាហានរុស្ស៊ីជាង ៧០០.០០០នាក់ កំពុងប្រយុទ្ធនៅក្នុងប្រទេសអ៊ុយក្រែន។

ទីភ្នាក់ងារសារព័ត៌មាន TASS បានរាយការណ៍ថា លោក Putin បានប្រកាសបែបនេះនៅក្នុងកិច្ចប្រជុំជាមួយថ្នាក់ដឹកនាំសភា នៅទីក្រុងមូស្គូ ជាកិច្ចប្រជុំដែលផ្តោតសំខាន់លើការបង្កើតកូតា សម្រាប់ការងារជាបន្តបន្ទាប់របស់អតីតយុទ្ធជន ក្នុងសម័យសង្គ្រាម។ លោក Putin ត្រូវបានដកស្រង់សម្តី ដែលបាននិយាយថា៖ «អ្នកឃើញទេ មានមនុស្សជាង ៧០០.០០០នាក់ កំពុងស្ថិតនៅសមរភូមិជួរមុខ»។

យ៉ាងណាក្ដី គេមិនដឹងច្បាស់ថា តើតួរលេខដែលលោក Putin បានលើកឡើង ជាការពិតដែរ ឬយ៉ាងណា ព្រោះមិនអាចត្រូវបានផ្ទៀងផ្ទាត់ដោយឯករាជ្យឡើយ។ ថ្មីៗនេះ អ្នកជំនាញខាងយោធា បានប៉ាន់ប្រមាណកម្លាំងសរុបនៃកងកម្លាំងប្រដាប់អាវុធរុស្ស៊ី ក្នុងនោះរួមទាំងទាហាននៅខាងក្រៅអ៊ុយក្រែនផងដែរ មានប្រហែលនៅក្រោមចំនួន ១,៣លាននាក់។ ចំណែកកងកម្លាំងរបស់ទីក្រុងគីវ ត្រូវបានប៉ាន់ស្មានថា មានទាហានសកម្មប្រហែល ៩០០.០០០នាក់។

គួរបញ្ជាក់ថា រុស្ស៊ីបានធ្វើសង្រ្គាមជាមួយអ៊ុយក្រែនអស់រយៈពេលជាង ៣ឆ្នាំកន្លះហើយ ហើយបានកាន់កាប់ប្រហែល ១ភាគ៥នៃដែនដីរបស់ប្រទេសនេះ។ ភាគីទាំង២ មិនបានផ្តល់ព័ត៌មានលម្អិតច្បាស់លាស់នៃការខាតបង់របស់ពួកគេនោះឡើយ រហូតមកដល់ពេលនេះទេ៕