Copernicus ដែលជាស្ថាប័នតាមដានអាកាសធាតុរបស់សហភាពអឺរ៉ុប (EU) កាលពីថ្ងៃព្រហស្បតិ៍ (ទី១៨ ខែកញ្ញា) បានឲ្យដឹងថា ចំហេះព្រៃនៅទូទាំងទ្វីបអឺរ៉ុប នារដូវក្តៅនេះ ជាពិសេស នៅឧបទ្វីប Iberia បានបណ្តាលឲ្យមានការបំភាយឧស្ម័នកាបូនដ៏ធំបំផុតរបស់ទ្វីបនេះជាលើកដំបូង ក្នុងរយៈពេលជិត ២៥ឆ្នាំ។

នាយកទីភ្នាក់ងារតាមដានបរិយាកាស Copernicus លោកស្រី Laurence Rouil បាននិយាយថា បន្ទាប់ពីមាននូវរដូវក្តៅដែលត្រូវបានសម្គាល់ដោយ «សកម្មភាពចំហេះព្រៃយ៉ាងខ្លាំងក្លា» «ការបំភាយដែលបណ្តាលមកពីចំហេះព្រៃទាំងនេះ គឺមានទំហំធំបំផុតជាងរដូវក្តៅណាទាំងអស់ ក្នុងរយៈពេល ២៣ឆ្នាំចុងក្រោយនេះ»។

នៅទូទាំង EU និងចក្រភពអង់គ្លេស អគ្គិភ័យនេះបានបញ្ចេញកាបូនឌីអុកស៊ីតដែលធ្វើឲ្យភពផែនដីឡើងកម្ដៅចំនួន ១២,៩មេហ្គាតោនទៅក្នុងបរិយាកាស រហូតដល់ថ្ងៃទី១៥ ខែកញ្ញា ដោយបានលើសកម្រិតពីមុន ១១,៤មេហ្គាតោន ដែលបានកើតមានក្នុងឆ្នាំ២០០៣ និងឆ្នាំ២០១៧។

ដោយផ្អែកលើការប៉ាន់ប្រមាណរបស់ស្ថាប័នតាមដាននេះ ការបំភាយឧស្ម័នប្រចាំឆ្នាំសរុបរបស់ទ្វីបនេះ ត្រូវបានកំណត់ថា ជាកម្រិតខ្ពស់បំផុត គិតចាប់តាំងពីកាតកត់កំណត់ត្រាបានចាប់ផ្តើមឡើង កាលពី ២៣ឆ្នាំមុន «ដោយរដូវកាលចំហេះព្រៃនៅតែសកម្មនៅឡើយ»។

វាបានកើតឡើងក្នុងពេលដំណាលគ្នាដែលអឺរ៉ុប និងតំបន់មេឌីទែរ៉ាណេ មានគ្រោះរាំងស្ងួតដ៏អាក្រក់បំផុត ក្នុងខែសីហា ដោយផ្អែកលើទិន្នន័យរបស់សហភាពអឺរ៉ុប។ នេះជាឧទាហរណ៍មួយបន្ថែមទៀតនៃការបំបែកកំណត់ត្រាអាកាសធាតុ ក្នុងប៉ុន្មានឆ្នាំថ្មីៗនេះ ដោយសារការឡើងកម្ដៅផែនដី៕