អំឡុងដំណើរទស្សនកិច្ច នៅទីក្រុងម៉ាឌ្រីដ ប្រទេសអេស្ប៉ាញ កាលពីថ្ងៃព្រហស្បតិ៍ (ទី១៨ ខែកញ្ញា) លោកអធិការបតី Friedrich Merz បាននិយាយថា ប្រទេសអាល្លឺម៉ង់នឹងឈានដល់ការសម្រេចចិត្តថា តើត្រូវគាំទ្រការដាក់ទណ្ឌកម្មរបស់សហភាពអឺរ៉ុប (EU) ប្រឆាំងនឹងអ៊ីស្រាអែលដែរ ឬយ៉ាងណា នៅមុនកិច្ចប្រជុំ EU នៅទីក្រុង Copenhagen ប្រទេសដាណ៉ម៉ាក ក្នុងខែតុលា។

ក្នុងអំឡុងពេលថ្លែងជាមួយនាយករដ្ឋមន្រ្តីអេស្ប៉ាញ លោក Pedro Sanchez លោក Merz បានលើកឡើងថា សកម្មភាពរបស់អ៊ីស្រាអែល នៅតំបន់ហ្កាហ្សា មិនសមាមាត្រទៅនឹងគោលដៅដែលបានអះអាងរបស់ខ្លួនឡើយ ប៉ុន្តែបានបញ្ជាក់ថា អាល្លឺម៉ង់មិនបានចូលរួមជាមួយនឹងទស្សនៈ ដែលថា សកម្មភាពនេះស្មើនឹងអំពើប្រល័យពូជសាសន៍នោះទេ។ ហើយលោកបានបន្ថែមទៀតថា សម្រាប់ប្រទេសអាល្លឺម៉ង់ ការទទួលស្គាល់ភាពជារដ្ឋរបស់ប៉ាឡេស្ទីន មិនទាន់មានសម្រាប់ការជជែកដេញដោលគ្នានៅឡើយទេ។

យ៉ាងណាក្ដី ការអត្ថាធិប្បាយរបស់លោក Merz គូសបញ្ជាក់ពីរបៀបដែលអាល្លឺម៉ង់កាន់តែមានឆន្ទៈ ក្នុងការរិះគន់អ៊ីស្រាអែល ប៉ុន្តែនៅតែស្ទាក់ស្ទើរក្នុងការចាត់វិធានការដាក់ទណ្ឌកម្មប្រឆាំងនឹងប្រទេសនេះ ដែលរដ្ឋាភិបាលមានអារម្មណ៍ថា ជាការទទួលខុសត្រូវពិសេស។

គួរបញ្ជាក់ថា គណៈកម្មការអឺរ៉ុបកាលពីថ្ងៃពុធ បានស្នើឲ្យផ្អាកកិច្ចព្រមព្រៀងពាណិជ្ជកម្ម ដែលប៉ះពាល់ដល់ការនាំចេញរបស់អ៊ីស្រាអែលប្រហែល ៥,៨ពាន់លានអឺរ៉ូ (៦,៨៧ពាន់លានដុល្លារ) ដោយសារសង្គ្រាមនៅតំបន់ហ្កាហ្សា តែវិធានការនេះ បច្ចុប្បន្ន មិនមានការគាំទ្រគ្រប់គ្រាន់ ក្នុងចំណោមប្រទេសសមាជិក EU ដើម្បីអនុម័តនៅឡើយទេ។

លោក Merz បាននិយាយថា៖ «យើងនឹងឈានដល់ការបង្ហាញទស្សនៈចុងក្រោយរបស់រដ្ឋាភិបាលអាល្លឺម៉ង់ ជុំវិញបញ្ហាទាំងនេះ ដែលឥឡូវនេះចាំបាច់ត្រូវឆ្លើយនៅកម្រិតអឺរ៉ុប ក្នុងរយៈពេលប៉ុន្មានថ្ងៃខាងមុខនេះសិន»៕