ការិយាល័យសិទ្ធិមនុស្សរបស់អង្គការសហប្រជាជាតិ (UN) បានឲ្យដឹងនៅថ្ងៃសុក្រ (ទី១៩ ខែកញ្ញា) នេះ ថា ប្រទេសស៊ូដង់បានមើលឃើញការកើនឡើងយ៉ាងខ្លាំងនូវការសម្លាប់ជនស៊ីវិល ក្នុងអំឡុងឆមាសទី១ នៃឆ្នាំនេះ ដោយសារតែអំពើហិង្សាជនជាតិភាគតិចមានកាន់តែខ្លាំងឡើងៗ។

ជម្លោះក្នុងប្រទេសស៊ូដង់ដែលបានផ្ទុះឡើងក្នុងខែមេសា ឆ្នាំ២០២៣ រវាងកងកម្លាំងប្រដាប់អាវុធស៊ូដង់ (SAF) និងក្រុមប្រដាប់អាវុធគូប្រជែង គឺកងកម្លាំងគាំទ្ររហ័ស (RSF) បានឃើញនូវកម្រិតដ៏គួរខ្លាចនៃអំពើហិង្សាលើជនស៊ីវិល និងបានបង្កើតឲ្យមានវិបត្តិមនុស្សធម៌ដ៏អាក្រក់បំផុតរបស់ពិភពលោក។

យោងតាមរបាយការណ៍ថ្មីរបស់ការិយាល័យឧត្តមស្នងការសិទ្ធិមនុស្ស (OHCHR) បានឲ្យដឹងថា យ៉ាងហោចណាស់ជនស៊ីវិល ៣.៣៨៤នាក់ ត្រូវបានសម្លាប់នៅចន្លោះខែមករា ដល់ខែមិថុនា ដែលភាគច្រើននៅក្នុងទីក្រុង Darfur។ តួលេខនេះគឺស្មើនឹងជិត ៨០ភាគរយនៃជនរងគ្រោះជាជនស៊ីវិល នៅក្នុងប្រទេសស៊ូដង់ ដែលត្រូវបានកត់ត្រាកាលពីឆ្នាំមុន។

តំណាង OHCHR នៅស៊ូដង់ លោក Li Fung បានប្រាប់អ្នកសារព័ត៌មាននៅទីក្រុងហ្សឺណែវ ប្រទេសស្វីសថា៖ «ជារៀងរាល់ថ្ងៃ យើងកំពុងទទួលបានរបាយការណ៍ជាច្រើនដ៏គួរឲ្យតក់ស្លុត នៅលើដី»។

OHCHR បានឲ្យដឹងថា ការស្លាប់ភាគច្រើន គឺដោយសាការបាញ់ផ្លោងកាំភ្លើងធំ ក៏ដូចជាការវាយប្រហារតាមអាកាស និងយានដ្រូន នៅក្នុងតំបន់ដែលមានប្រជាជនរស់យ៉ាងណែនណាន់តាន់តាប់។ ស្ថាប័ននេះបានកត់សម្គាល់ថា ការស្លាប់ជាច្រើន បានកើតឡើងក្នុងអំឡុងពេលមានការវាយលុករបស់ RSF លើទីក្រុង El Fasher ក៏ដូចជាជំរុំ ZamZam និង Abu Shouk សម្រាប់ជនភៀសខ្លួន នៅក្នុងខែមេសា។

ជាមួយគ្នានេះ របាយការណ៍បានរកឃើញថា យ៉ាងហោចណាស់ជនស៊ីវិល ៩៩០នាក់ ត្រូវបានសម្លាប់ នៅក្នុងការសម្លាប់ក្រៅប្រព័ន្ធ នៅក្នុងឆមាសទី១ នៃឆ្នាំនេះ ដោយចំនួន ចន្លោះខែកុម្ភៈ ដល់ខែមេសា កើនឡើង ៣ដង។ OHCHR បានបន្ថែមថា ចំនួននោះត្រូវបានជំរុញដោយការកើនឡើងជាចម្បង នៅក្នុងទីក្រុង Khartoum បន្ទាប់ពី SAF និងក្រុមយុទ្ធជនសម្ព័ន្ធមិត្តកាលពីចុងខែមីនា បានវាយដណ្តើមកាន់កាប់បានវិញនូវទីក្រុងដែលនៅមុននោះគ្រប់គ្រងដោយ RSF៕