ប្រេសិតពិសេសអង្គការសហប្រជាជាតិ(UN)ប្រចាំនៅប្រទេសស៊ីរីលោក Geir Pedersen បានប្រកាសឲ្យដឹងកាលពីថ្ងៃព្រហស្បតិ៍ថា លោកនឹងលាលែងពីតំណែងក្នុងពេលដ៏ខ្លីខាងមុខនេះ ក្រោយបម្រើការងារអស់រយៈពេល ៦ឆ្នាំ និងស្របពេលដែលប្រទេសស៊ីរីឆ្លងកាត់ការផ្លាស់ប្តូរជាប្រវត្តិសាស្រ្ត បន្ទាប់ពីការផ្តួលរំលំអតីតមេដឹកនាំលោក Bashar al-Assad កាលពីឆ្នាំមុន ។

លោកបាននិយាយប្រាប់ក្រុមប្រឹក្សាសន្តិសុខ UNថា លោកអគ្គលេខាធិការ Antonio Guterres បានទទួលយកការលាលែងពីតំណែងរបស់លោក ។

លោក Pedersen និយាយប្រាប់ក្រុមប្រឹក្សាមានសមាជិក ១៥រដ្ឋមួយនេះថា វាគឺជាបំណងប្រាថ្នារបស់លោកជាយូរមកហើយ ដើម្បីលាលែងពីតំណែងមួយនេះ សម្រាប់ហេតុផលផ្ទាល់ខ្លួន ក្រោយបម្រើការអស់រយៈពេលវែង ។

លោកបន្តថា បទពិសោធន៍របស់លោកនៅស៊ីរីបានបញ្ជាក់ការពិតដ៏យូរអង្វែងមួយ ជួនកាលវាជាមេឃងងឹតមុនពេលថ្ងៃរះ ។

លោក Assad ត្រូវបានទម្លាក់ចេញពីតំណែងដោយក្រុមឧទ្ទាមកាលពីខែធ្នូ ឆ្នាំមុន ដែលបានបញ្ចប់សង្រ្គាមស៊ីវិលរយៈពេល ១៤ឆ្នាំ ដែលបានផ្ទុះឡើង ដោយសារបដិវត្តន៍ពណ៌ប្រឆាំងនឹងរូបលោក ។

 អំឡុងសង្រ្គាមស៊ីវិល លោក Pedersen ជាមនុស្សម្នាក់ក្នុងចំណោមប្រេសិតពិសេសជាច្រើនរូបរបស់ UN ដឹកនាំបេសកកម្មនយោបាយ មានគោលដៅចរចាស្វែងរកដំណោះស្រាយសន្តិភាពរវាងរបបលោក Assad និងក្រុមប្រឆាំង ៕