យោធាអ៊ីស្រាអែលបានព្រមាននៅថ្ងៃសុក្រ (ទី១៩ ខែកញ្ញា) នេះ បានឲ្យដឹងថា ខ្លួននឹងប្រតិបត្តិការជាមួយនឹង «កម្លាំងមិនធ្លាប់មានពីមុន» នៅទីក្រុងហ្កាហ្សា ដោយជំរុញឲ្យអ្នកស្រុកភៀសខ្លួនទៅភាគខាងត្បូង ខណៈប្រកាសបិទផ្លូវជម្លៀសបណ្តោះអាសន្នដែលបានបើករយៈពេល ៤៨ម៉ោងមុន។

ការប៉ុនប៉ងរបស់អ៊ីស្រាអែល ដើម្បីដណ្តើមកាន់កាប់ទីក្រុងហ្កាហ្សា បានបង្កឲ្យមានការខឹងសម្បាជាអន្តរជាតិ ដោយដែនដីនេះត្រូវបានបំផ្លិចបំផ្លាញដោយសង្រ្គាមជិត ២ឆ្នាំ និងត្រូវបានរួបរឹតដោយគ្រោះទុរ្ភិក្សដែលប្រកាសដោយអង្គការសហប្រជាជាតិ (UN)។

ការប្រកាសនេះកើតមានឡើង នៅមុនចំណាត់ការគ្រោងទុកដោយប្រទេសលោកខាងលិចមួយចំនួន ក្នុងនោះមានរួមទាំងបារាំង និងអង់គ្លេសផងដែរ ដែលនឹងទទួលស្គាល់រដ្ឋប៉ាឡេស្ទីននៅសប្តាហ៍ក្រោយ នៅឯកិច្ចប្រជុំកំពូលរបស់ UN។

UN បានប៉ាន់ប្រមាណកាលពីចុងខែសីហាថា មនុស្សប្រហែល ១លាននាក់ កំពុងរស់នៅក្នុងទីក្រុងហ្កាហ្សា និងតំបន់ជុំវិញទីក្រុងនេះ។ អ៊ីស្រាអែលប្រាប់ថា អ្នកស្រុករាប់សែននាក់បានភៀសខ្លួនចេញពីទីក្រុងដ៏ធំបំផុតរបស់តំបន់ហ្កាហ្សាស្ទ្រីបនេះ។

តាមរយៈការបង្ហោះនៅលើបណ្ដាញសង្គម X ទៅកាន់ប្រជាជននៅទីក្រុងហ្កាហ្សា អ្នកនាំពាក្យភាសាអារ៉ាប់របស់យោធា លោកវរសនីយ៍ឯក Avichay Adraee បាននិយាយថា៖ «ចាប់ពីពេលនេះតទៅ ផ្លូវ Salah al-Din ត្រូវបានបិទ សម្រាប់ការធ្វើដំណើរទៅភាគខាងត្បូង។ កងកម្លាំងការពារអ៊ីស្រាអែលនឹងបន្តប្រតិបត្តិការជាមួយនឹងកម្លាំងដែលមិនធ្លាប់មានពីមុន ប្រឆាំងនឹងក្រុមហាម៉ាស និងអង្គការភេរវករផ្សេងទៀត»។

លោកបានបន្ថែមថា ផ្លូវតែមួយគត់ដែលអាចធ្វើដំណើរទៅភាគខាងត្បូង គឺតាមរយៈផ្លូវ Al-Rashid ដោយបានជំរុញឲ្យអ្នកស្រុក «ចាប់យកឱកាសនេះ ហើយចូលរួមជាមួយអ្នករស់នៅទីក្រុងរាប់សែននាក់ ដែលបានផ្លាស់ទៅភាគខាងត្បូង នៅតំបន់មនុស្សធម៌»៕