នាយករដ្ឋមន្ត្រីលុចសំបួ បានប្រាប់ឲ្យដឹងថា ការទទួលស្គាល់រដ្ឋប៉ាឡេស្ទីន នឹងជួយបន្តរក្សាដំណើរការសន្តិភាព នៅតំបន់មជ្ឈិមបូព៌ា ខណៈដែលប្រទេសរបស់លោកត្រៀមចាត់វិធានការបែបនេះ នៅសប្តាហ៍ក្រោយ។

ក្នុងចំណោមរដ្ឋសមាជិកចំនួន ១៩៣ របស់អង្គការសហប្រជាជាតិ (UN) មាន ១៤៧ប្រទេស ទទួលស្គាល់រដ្ឋប៉ាឡេស្ទីនរួចហើយ ប៉ុន្តែគ្មានប្រទេសណាមួយ ក្នុងចំណោមប្រទេសសេដ្ឋកិច្ចធំៗទាំង៧ (G7) បានធ្វើដូច្នេះឡើយ រហូតមកដល់ពេលនេះ។

ប្រទេសលុចសំបួ ស្ថិតក្នុងចំណោមប្រជាជាតិមួយចំនួន រួមមានអូស្ត្រាលី បែលហ្ស៊ិក កាណាដា បារាំង និងចក្រភពអង់គ្លេស ដែលគ្រោងនឹងចូលរួមក្នុងកិច្ចប្រជុំកំពូលរបស់ UN នៅទីក្រុងញូវយ៉ក សហរដ្ឋអាមេរិក នាថ្ងៃទី២២ ខែកញ្ញា។

លោកនាយករដ្ឋមន្ត្រី Luc Frieden បានលើកឡើងនៅក្នុងបទសម្ភាសន៍មួយថា៖ «ខ្ញុំចង់ឲ្យប្រជាជនអ៊ីស្រាអែល និងប៉ាឡេស្ទីន បន្តមានក្តីសង្ឃឹមថា ថ្ងៃណាមួយពួកគេនឹងអាចរស់នៅក្នុងសន្តិភាព»។

មេដឹកនាំកណ្ដាល-ស្ដាំនិយមវ័យ៦២ឆ្នាំ ដែលនឹងមានវត្តមាននៅទីក្រុងញូវយ៉ក ដើម្បីតំណាងប្រទេសរបស់លោក បានបញ្ជាក់បន្ថែមថា ការទទួលស្គាល់នឹងក្លាយជា «ពេលវេលាដ៏សំខាន់ក្នុងដំណើរការនេះ ពោលគឺជាជំហានដ៏សំខាន់ ក្នុងការធ្វើដំណើរដ៏វែងឆ្ងាយឆ្ពោះទៅរកសន្តិភាព និងស្ថិរភាពក្នុងតំបន់»។

ចាប់ផ្តើមនៅថ្ងៃចន្ទនេះ អារ៉ាប៊ីសាអ៊ូឌីត និងបារាំង នឹងធ្វើជាសហប្រធានកិច្ចប្រជុំរបស់ UN ស្តីពីអនាគតនៃដំណោះស្រាយរដ្ឋ២ គឺអ៊ីស្រាអែល និងប៉ាឡេស្ទីន ដោយមានបំណងចង់ឃើញភាគីទាំង២ ដែលរស់នៅក្បែរស្រាប់ប្រកបដោយសន្តិភាព។ គំនិតផ្តួចផ្តើមនេះប្រមូលបាននូវការគាំទ្រយ៉ាងច្រើន ចំពេលមានការតវ៉ាជាសកលកាន់តែខ្លាំងឡើងៗ ចំពោះសកម្មភាពរបស់អ៊ីស្រាអែល នៅតំបន់ហ្កាហ្សា៕