អ៊ីស្រាអែលកំពុងបាញ់ផ្លោងទៅលើទីក្រុងហ្កាហ្សាដោយការវាយលុកខ្លាំងបំផុតក្នុងរយៈពេលពីរឆ្នាំនៃសង្រ្គាមមកនេះ ក្នុងគោលបំណងដើម្បីបង្ខំឲ្យអ្នកស្រុកធ្វើដំណើរដ៏គ្រោះថ្នាក់ឆ្ពោះទៅកាន់ភាគខាងត្បូងដែលមានមនុស្សច្រើនកកកុញ។

លោក Avichay Adraee អ្នកនាំពាក្យជាភាសាអារ៉ាប់របស់កងទ័ពអ៊ីស្រាអែល បានព្រមានប្រជាជនដែលនៅសេសសល់ក្នុងទីក្រុងហ្កាហ្សាកាលពីថ្ងៃសុក្រថា ខ្លួននឹងដាក់ពង្រាយ «កងកម្លាំងដែលមិនធ្លាប់មានពីមុនមក» ដោយប្រាប់ពួកគេឱ្យ «ចូលរួមជាមួយមនុស្សរាប់ម៉ឺននាក់» ដែលកំពុងធ្វើដំណើរទៅភាគខាងត្បូងតាមផ្លូវឆ្នេរ al-Rashid ដែលបច្ចុប្បន្នជាផ្លូវរត់ភៀសខ្លួនតែមួយគត់ត្រូវបានអនុញ្ញាត។

លោក Abu Azzoum បានរាយការណ៍ពីជំរំ Nuseirat តំបន់ហ្កាហ្សាភាគកណ្តាល ថា «ប្រតិបត្តិការយោធាបច្ចុប្បន្ននេះ កំពុងបំផ្លាញទាំងស្រុងនូវប្លុកទាំងមូល ហើយគ្រួសារជាច្រើននៅតែជាប់ក្រោមគំនរបាក់បែកនៃលំនៅឋានដែលត្រូវបានកំណត់គោលដៅ។

ខណៈចំនួនពលរដ្ឋប៉ាឡេស្ទីនដែលមានបំណងចាកចេញកើនឡើងនៅពេលនេះ ទោះបីជាមានការក្រាញននាលកាលពីពេលមុនក៏ដោយ ក៏មនុស្សជាច្រើនពុំមានលទ្ធភាពចំណាយលើការជួលរថយន្តដើម្បីនាំយករបស់របរប្រើប្រាស់ក្នុងផ្ទះ ដូចជាគ្រឿងសង្ហារឹមទៅកាន់តំបន់ al-Mawasi ដែលចង្អៀតណែននៅភាគខាងត្បូងតំបន់ហ្កាហ្សាឡើយ។