ទីភ្នាក់ងារស៊ើបការណ៍សម្ងាត់ជាតិអ៊ីរ៉ាក់ បាននិយាយកាលពីថ្ងៃសុក្រថា ជនជាតិបារាំងចំនួន ៤៧នាក់ដែលត្រូវគេតាមចាប់ខ្លួន ដើម្បីយកមកកាត់ទោស ដោយសារតែទំនាក់ទំនងរបស់ពួកគេ ជាមួយក្រុមជ្រុលនិយមរដ្ឋឥស្លាម (IS) ត្រូវបានបញ្ជូនពីភាគឦសានប្រទេសស៊ីរី ទៅកាន់ប្រទេសអ៊ីរ៉ាក់។

ទីភ្នាក់ងារនេះ បាននិយាយនៅក្នុងសេចក្តីថ្លែងការណ៍មួយថា ជនសង្ស័យមួយចំនួន បានជាប់ពាក់ព័ន្ធក្នុងឧក្រិដ្ឋកម្មភេរវកម្ម នៅក្នុងប្រទេសអ៊ីរ៉ាក់ ពីឆ្នាំ ២០១៤ ដល់ឆ្នាំ ២០១៧ នៅពេលដែលក្រុម IS បានគ្រប់គ្រងខេត្តមួយចំនួនរបស់អ៊ីរ៉ាក់ ខណៈដែលអ្នកផ្សេងទៀត បានចូលរួមក្នុងសកម្មភាព នៅខាងក្រៅប្រទេសអ៊ីរ៉ាក់ ដែលគំរាមកំហែងដល់សន្តិសុខជាតិអ៊ីរ៉ាក់។

សេចក្តីថ្លែងការណ៍ បានឲ្យដឹងថា ការបញ្ជូននេះ ត្រូវបានធ្វើឡើងដោយផ្អែកលើដីកាចាប់ខ្លួនរបស់តុលាការ ហើយជនសង្ស័យ នឹងត្រូវបានកាត់ទោស ស្របតាមច្បាប់របស់ប្រទេសអ៊ីរ៉ាក់ ដោយបានបន្ថែមថា ទីភ្នាក់ងារនេះ នៅតែតាមស្វែរងកចាប់ខ្លួនសមាជិក IS ដែលបានប្រព្រឹត្តឧក្រិដ្ឋកម្មប្រឆាំងនឹងប្រជាជនអ៊ីរ៉ាក់ ដោយមិនគិតពីទំនាក់ទំនង ឬទីតាំងរបស់ពួកគេទេ។ 

ក្នុងឆ្នាំ ២០១៤ ក្រុម IS បានបើកការវាយលុកដ៏ធំមួយ និងដណ្តើមយកតំបន់ធំៗរបស់អ៊ីរ៉ាក់។ នៅខែធ្នូ ឆ្នាំ ២០១៧ អ៊ីរ៉ាក់ បានប្រកាសជ័យជម្នះលើក្រុមនេះ បន្ទាប់ពីដណ្តើមយកទឹកដីដែលខ្លួនធ្លាប់កាន់កាប់មកវិញ៕