ឯកឧត្តម ឈាន វុន សមាជិកគណៈប្រតិភូសភាកម្ពុជា បានអញ្ជើញដឹកនាំប្រតិភូសភាកម្ពុជា ចូលរួមកិច្ចប្រជុំគណៈកម្មាធិការបូកសរុបអាយប៉ា(Joint Communique) នៃមហាសន្និបាតអន្តរសភា អាស៊ាន (អាយប៉ា/AIPA)លើកទី៤៦ នៅទីក្រុងគូឡាឡំាពួ ប្រទេសម៉ាឡេស៊ី នៅព្រឹកថ្ងៃទី២០ ខែកញ្ញា ឆ្នាំ២០២៥ ដើម្បីពិនិត្យ ពិភាក្សាលើរបាយការណ៍ លទ្ធផលកិច្ចប្រជុំនិងសកម្មភាពនានា អំឡុងពេលដំណើរការមហាសន្និបាតអាយប៉ាលើកទី៤៦ រយៈពេល៤ថ្ងៃកន្លងមកនេះ។

លទ្ធផលនៃកិច្ចប្រជុំគណៈកម្មាធិការបូកសរុបនេះ នឹងដាក់ជូនសម័យប្រជុំពេញអង្គលើកទី២ នៃមហាសន្និបាត អាយប៉ាលើកទី៤៦ ដែលមានប្រធានគណៈប្រតិភូសភាសមាជិកអាយប៉ា ចូលរួម ធ្វើការពិភាក្សានិងអនុម័ត នៅរសៀលថ្ងៃទី២០កញ្ញានេះ មុនបិទបញ្ចប់មហាសន្និបាត។

សូមជម្រាបថា មហាសន្និបាតអន្តរសភាអាស៊ានលើកទី៤៦ ឆ្នាំ២០២៥ ដែលសភាប្រទេសម៉ាឡេស៊ីធ្វើជាម្ចាស់ផ្ទះ ប្រារព្ធធ្វើឡើងក្រោមប្រធានបទ “សភាទៅមុខសម្រាប់កំណើនប្រកបដោយបរិយាបន្ន និងអាស៊ានប្រកបដោយចីរភាព” ចាប់ពីថ្ងៃទី១៧ដល់ថ្ងៃទី២១ ខែកញ្ញា។

អំឡុងពេលដំណើរការ មហាសន្និបាត៤ថ្ងៃកន្លងមកនេះ អាយប៉ា មានកិច្ចប្រជុំពាក់ព័ន្ធជាច្រើន ដូចជា កិច្ចប្រជុំគណៈកម្មាធិការប្រតិបត្តិ វេទិកាអ្នកនយោបាយស្រ្តីលើកទី២ កិច្ចប្រជុំគណៈកម្មាធិការស្រ្តីអាយប៉ា(WAIPA) កិច្ចប្រជុំគណៈកម្មាធិការសេដ្ឋកិច្ច គណៈកម្មាធិការសង្គមកិច្ច គណៈកម្មាធិការរៀបចំ កិច្ចប្រជុំសមាជិកសភាវ័យក្មេងអាយប៉ា(YPA) និងកិច្ចសន្ទនាជាមួយសភាសង្កេតការណ៍អាយប៉ា ជាដើម៕