សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី២០ ខែកញ្ញា ឆ្នាំ២០២៥ បានជួបពិភាក្សាការងារជាមួយ ឯកឧត្តមបណ្ឌិត តាន់ស៊ី ដាតូ ហ្សូហារី ប៊ីន អាប់ឌុល (Tan Sri Dato (Dr.) Johari Bin Abdul) ប្រធានរដ្ឋសភានៃប្រទេសម៉ាឡេស៊ី និងជាប្រធានអាយប៉ាលើកទី៤៦ ក្នុងពេលដែលសម្តេចអញ្ជើញចូលរួមមហាសន្និបាតអន្តរសភាអាស៊ាន (អាយប៉ា/AIPA) លើកទី៤៦ នៅក្នុងទីក្រុងគូឡាឡាំពួ។

នៅក្នុងឱកាសនោះសម្តេចប្រធានរដ្ឋសភា បានថ្លែងអណរគុណដល់ ឯកឧត្តមប្រធានរដ្ឋសភាម៉ាឡេស៊ីដែលជាប្រធានអាយប៉ាលើកទី៤៦ ដែលបានទទួលស្វាគមន៍គណៈប្រតិភូសភាកម្ពុជាយ៉ាងកក់ក្តៅបំផុត។ ជាមួយគ្នានេះ សម្តេចប្រធានរដ្ឋសភា ចូលរួមអបអរសាទរ និងវាយតម្លៃខ្ពស់ ចំពោះប្រទេសម៉ាឡេស៊ី ដែលបានបំពេញតួនាទីបានយ៉ាងល្អនៅក្នុងការដឹកនាំរៀបចំមហាសន្និបាតអាយប៉ាលើកទី៤៦ ប្រកបដោយជោគជ័យ មានអត្ថន័យឆ្ពោះសម្រេចបានចក្ខុវិស័យអាស៊ានឆ្នាំ២០៤៥ ប្រកបដោយចីរភាព បរិយាបន្ននិងវិបុលភាព។

ក្នុងនាមពលរដ្ឋកម្ពុជា សម្តេចសូមអរគុណស្ថាប័ននីតិប្បញ្ញត្តិ នីតិប្រតិបត្តិម៉ាឡេស៊ី ដែលខិតខំសម្របសម្រួលនៅក្នុងការបង្កើតឱ្យមានបទឈប់បាញ់និងចូលសង្កេតការណ៍យ៉ាងយកចិត្តទុកដាក់លើការអនុវត្តបទឈប់បាញនិងបន្តតាមដានសភាពការណ៍ជាប់ជាប្រចាំ។ សម្តេចបានគូសបញ្ជាក់ថាកម្ពុជាត្រូវការសុខសន្តិភាព ។សន្តិភាពដែលមិនត្រឹមសម្រាប់ពលរដ្ឋកម្ពុជានិងថៃប៉ុណ្ណោះទេ តែសម្រាប់សហគមន៍អាស៊ានទំាងមូល។ “ក្នុងនាមសមាជិកអាស៊ាន យើងត្រូវការពារសុខសន្តិភាពក្នុងតំបន់ មិនគួរបណ្តោយឱ្យបញ្ហាជាអរិភាពណាមួយ រីករាលដាលកាន់តែធំសម្រាប់គ្រួសារអាស៊ាននោះឡើយ។

សម្តេចប្រធានរដ្ឋសភា បានគូសបញ្ជាក់ថាទំនាក់ទំនងកម្ពុជា ម៉ាឡេស៊ី មានការរីកចម្រើនយ៉ាងខ្លំាងក្លានិងគ្រប់វិស័យ។ សម្តេចអរគុណម៉ាឡេស៊ី ដែលបានផ្តើមវិនិយោគនៅកម្ពុជាតំាងពីឆ្នាំ១៩៩៣មក ដែលប្រការនេះ កើតចេញពីការទុកចិត្ត និងការជឿជាក់លើចំណងមិត្តភាព កិច្ចសហប្រតិបត្តិការប្រទេសទំាងពីរ។ សម្តេចប្រធានរដ្ឋសភា បានលើកឡើងថាអំឡុងពេលស្នាក់នៅទីក្រុងគូឡំាឡាំពួ ដ៏ស្រស់ស្អាត សម្តេចបានជួបប្រាស្រ័យទាក់ទងជាមួយអ្នកអ្នកវិនិយោគម៉ាឡេស៊ី មួយចំនួន ហើយពួកគាត់បានបង្ហាញពីចំណាប់អារម្មណ៍នៅក្នុងការវិនិយោគនៅក្នុងប្រទេសកម្ពុជា ដូចជានៅក្នុងវិស័យឧស្សាហកម្មចំណីអាហារជាដើម។ សម្តេចរដ្ឋសភាធិបតី បានគួសបញ្ជាក់ថា កម្ពុជានិងម៉ាឡេស៊ី នៅមានសក្តានុពលជាច្រើនទៀតត្រូវពង្រីកបន្ថែមទៀត ដូចជាវិស័យពាណិជ្ជកម្ម ទេសចរណ៍ សុខាភិបាល និងបច្ចេកវិទ្យាជាដើម។

ឯកឧត្តមបណ្ឌិត តាន់ស៊ី ដាតូ ហ្សូហារី ប៊ីន អាប់ឌុល បានថ្លែងអំណរគុណជូនសម្តេចប្រធានរដ្ឋសភា ដែលបានអញ្ជើញដឹកនាំគណៈប្រតិភូជាន់ខ្ពស់សភា មកចូលរួមមហាសន្និបាតអាយប៉ាលើកទី៤៦ ដែលសភាប្រទេសម៉ាឡេស៊ីធ្វើជាម្ចាស់ផ្ទះ និងបានចែករំលែកនូវទស្សនៈ បទពិសោធន៍ យ៉ាងសកម្មដើម្បីចូលរួមលើកកម្ពស់វិបុលភាពអាស៊ាននិងសកលោក តាមរយៈតួនាទីដ៏សំខាន់របស់សភា។ ប្រធានមហាសន្និបាតអាយប៉ាលើកទី៤៦ បានវាយតម្លៃខ្ពស់ចំពោះឆន្ទៈមោះមុតរបស់កម្ពុជា ដើម្បីសន្តិភាព សុវត្ថិភាពរបស់ពលរដ្ឋ ។ ជាពិសេសការស្វែងរកដំណោះស្រាយដោយសន្តិវិធី នៅក្នុងការដោះស្រាយជម្លោះព្រំដែនជាមួយប្រទេសជិតខាង។

ឯកឧត្តមប្រធានរដ្ឋសភាម៉ាឡេស៊ី បានឯកភាពចំពោះការលើកឡើងរបស់សម្តេចប្រធានរដ្ឋសភា ពីចំណងមិត្តភាពកម្ពុជា-ម៉ាឡេស៊ី ដែលប្រៀបបានជាបងប្អូនបង្កើតដូច្នេះដែរ។ ឯកឧត្តមប្រធានរដ្ឋសភាបានគូសបញ្ជាក់ថា ទំនាក់ទំនងពលរដ្ឋប្រទេសទំាងពីរមានភាពជិតស្និទ្ធជាខ្លំាង ។ ពលរដ្ឋកម្ពុជាដែលកំពុងរស់នៅនិងធ្វើការនៅក្នុងប្រទេសម៉ាឡេស៊ី ជាពលរដ្ឋស្មោះត្រង់ ខិតខំប្រឹងប្រែងនិងបានចូលរួមចំណែកដល់ការអភិវឌ្ឍរបស់ម៉ាឡេស៊ីផងដែរ៕