ភ្នំពេញ៖ រដ្ឋមន្ត្រីការបរទេស នៃប្រទេសទីម័រខាងកើត បានគោរពស្នើសុំសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងនាមជាប្រធានអាស៊ាន ឆ្នាំ២០២២ ធ្វើយ៉ាងណាឱ្យប្រទេសទីម័រខាងកើត បានចូលជាសមាជិកអង្គការពាណិជ្ជកម្មពីភពលោក (WTO) និងជាសមាជិកអាស៊ានឱ្យបានឆាប់។

លោកជំទាវបណ្ឌិត អាដាហ្សា អាល់ ប៊ែរទីណា ហ្សាវីយេ រៃយ៍ ម៉ាកណូ (Dr. Adaza Albertina Xavier Reis Magno) រដ្ឋមន្ត្រីការបរទេស ប្រទេសទីម័រ​ខាង​កើត នៅព្រឹកថ្ងៃទី២៨ ខែមករានេះ ត្រូវបាន​សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ​និងជាប្រធានអាស៊ាន អនុញ្ញាតឱ្យចូលជួប​សំដែង​ការគួរសម ក្នុងជំនួបនេះលោកស្រីរដ្ឋមន្ត្រីការបរទេសទីម័រ ​បានគោរពស្នើសុំសម្ដេចតេជោ ក្នុងនាម​ជាប្រធានអាស៊ាន​ ជួយប្រទេសទីមរខាងកើត ​បានចូលជាសមាជិកអាស៊ាន និងបានគោរព​ស្នើសុំ​អនុសាសន៍ណែនាំពីសម្ដេចតេជោ ​ដើម្បីធ្វើយ៉ាងណាជំរុញកិច្ចសហប្រតិបត្តិការ លើវិស័យ​ពាណិជ្ជកម្ម សេដ្ឋកិច្ច ​រវាង​ប្រទេស​ទាំង​ពីរ​ឲ្យ​កាន់​តែធំទូលំទូលាយ​ឡើង។​នេះបើតាមការឱ្យដឹងពីឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ នៅក្រោយកិច្ចជំនួបនេះ។

ឯកឧត្តម បានឱ្យដឹងទៀតថា លោកស្រី ក៏បានជម្រាបជូនសម្ដេចពីបំណងបញ្ជូនអ្នកបច្ចេកទេស របស់​ទីម័រខាងកើតមកសិក្សាពីកម្ពុជា ពាក់ព័ន្ធនឹងការចូលខ្លួនទៅក្នុងអង្គការ WTO និងសមា​ជិ​ក​​អា​ស៊ាន។

លោកស្រី បានគោរពកោតសរសើរ និងវាយតម្លៃខ្ពស់ ចំពោះវីរភាពដ៏ថ្លៃថ្លារបស់សម្ដេចតេជោ ក្នុងការដឹកនាំកម្ពុជា​ឱ្យមានសុខសន្តិភាពសេរីភាព​ និងការអភិវឌ្ឍលឿនជាទីបំផុត។

សម្ដេចតេជោ ហ៊ុន សែន បានបញ្ជាក់ថា​ ចំពោះសំណើរបស់ទីម័រខាងកើត សុំចូល​ជា​សមាជិក​អាស៊ាន កម្ពុជាតែងតែសម្ដែងនូវការគាំទ្រ ហើយតទៅមុខកម្ពុជា នឹង​ខិតខំរៀបចំ​បេសកកម្ម​ស្វែង​រកការពិតនៅប្រទេសទីម័រខាងកើតឲ្យបានឆាប់ ដើម្បី​ជាមូលដ្ឋានក្នុងការវាយតម្លៃ និងរៀប​ចំផែន​ទី​ចង្អុល​ផ្លូវ ព្រមទាំងពេលវេលាច្បាស់លាស់​សម្រាប់ប្រទេសទីម័រខាងកើតចូលជាសមាជិកអាស៊ាន។ ពាក់ព័ន្ធកិច្ចសហប្រតិបត្តិការរវាងប្រទេសទាំងពីរ សម្ដេចបានស្វាគមន៍ ក្នុងការបញ្ជូនអ្នកបច្ចេក​ទេស​មកកម្ពុជា ដើម្បីសិក្សាស្វែងយល់អំពីការចូលជាសមាជិកអង្គការWTO ចូលជាសមាជិក អាស៊ាន ​ហើយក៏ស្នើសុំឲ្យស្ថាប័នពាក់ព័ន្ធ ​នៃប្រទេសទាំងពីរ​ជួបពិភាក្សាគ្នា ដើម្បី​រិះរក​វិធី​ជំរុញឲ្យមានការផ្លាស់ប្ដូរ ផ្នែកសេដ្ឋកិច្ចពាណិជ្ជកម្មឡើងវិញ ជាពិសេសជំរុញការ​អនុវត្ត​ឲ្យ​មាន​ប្រសិទ្ធភាព​នូវកិច្ចព្រមព្រៀង ​និងអនុស្សារណៈ ដែលបានចុះហត្ថលេខារួចហើយ។

សម្ដេចតេជោ បានស្នើសុំឲ្យប្រទេសទីម័រខាងកើត ពិនិត្យចាប់ផ្ដើមលើកិច្ចសហប្រតិបត្តិការ​រវាង​ប្រទេស​ទាំងពីរ ក្នុងការចាប់យកវិស័យសេដ្ឋកិច្ច ​ក្នុងការចាប់បញ្ជាទិញអង្ករពីកម្ពុជា ហើយ​ករណី​ការបញ្ជាទិញអង្ករពីកម្ពុជានេះ សម្ដេចបានមានប្រសាសន៍ថា អ្នកវិនិយោគរបស់ទីម័រខាងកើត អាច​មកវិនិយោគទាំងខាងម៉ាស៊ីនស្រូវ ​ទាំងខាងឃ្លាំងស្តុកស្រូវ ​ទាំង​ហេដ្ឋារចនាសម្ព័ន្ធសម្រាប់នាំចេញ ដើម្បី​ជាសេរីភាពសម្រាប់​ការ​ផ្គត់ផ្គង់​អង្ករ​ទៅកាន់ប្រទេសទីម័រខាងកើត។

សម្ដេច ក៏បានស្នើសុំឲ្យប្រទេសទីម័រខាងកើត ​ពិចារណាលើកិច្ចសហប្រតិបត្តិការ​ត្បូងត្បូង ​ជា​ពិសេសពិនិត្យឱ្យមានកិច្ចព្រម ​ព្រៀង​គាំពារវិនិយោគ​ រវាងប្រទេសទាំងពីរ កិច្ចព្រមព្រៀង​ពាណិជ្ជកម្មសេរី រ​វាងប្រទេសទាំងពីរ ​និងកិច្ចព្រមព្រៀងមិន ​យកពន្ធត្រួតគ្នា រវាងប្រទេសទាំងពីរ។

សម្ដេចតេជោ​ បានផ្ញើជូននូវការសួរសុខទុក្ខដល់ថ្នាក់ដឹកនាំ ​នៃប្រទេសទីម័រខាងកើត ហើយ​ក៏បានជូនពរឱ្យដំណើរការរៀបចំការបោះឆ្នោត​ប្រធានាធិបតីរបស់ទីម័រ​ខាង​កើត​នាពេលខាងមុខ ទទួល​បានជោគជ័យ និងពង្រីកទំនាក់ទំនង និងកិច្ចសហប្រតិបត្តិការទាំង​នៅ​ក្នុងក្របខ័ណ្ឌទ្វេភាគី និង​ពហុភាគី ដើម្បី​ផល​ប្រយោជន៍​ទៅវិញ​ទៅ​មក​​នៃប្រទេសទាំងពីរ៕អត្ថបទ៖ មុត សុទ្ធ