ប្រទេសរុស្ស៊ី បានរាយការណ៍កាលពីថ្ងៃសុក្រថា កងកម្លាំងរបស់ខ្លួន បានធ្វើការវាយប្រហារគ្រាប់បែកចង្កោមលើគោលដៅរបស់អ៊ុយក្រែន កាលពីសប្តាហ៍មុន ខណៈដែលអ៊ុយក្រែន បានអះអាងថា បានវាយប្រហារមជ្ឈមណ្ឌលដឹកជញ្ជូនយោធារុស្ស៊ី កាលពីថ្ងៃព្រហស្បតិ៍។

នៅក្នុងរបាយការណ៍ប្រចាំសប្តាហ៍ ក្រសួងការពារជាតិរុស្ស៊ី បានបញ្ជាក់ថា ក្នុងរយៈពេលមួយសប្តាហ៍កន្លងទៅនេះ កងកម្លាំងរុស្ស៊ី បានធ្វើការវាយប្រហារចង្កោមចំនួន ៤គ្រាប់ ដោយប្រើអាវុធកំណត់គោលដៅជាក់លាក់ និងយានដ្រូន។ ការវាយប្រហារទាំងនេះ បានកំណត់គោលដៅលើមធ្យោបាយដឹកជញ្ជូន និងថាមពលរបស់អ៊ុយក្រែន ឃ្លាំងគ្រាប់រំសេវ មជ្ឈមណ្ឌលបណ្តុះបណ្តាលប្រតិបត្តិករយានដ្រូន ឃ្លាំងផ្ទុក និងវាយប្រហារលើទីតាំងសម្រាប់យានដ្រូនដែលបញ្ជាពីចម្ងាយ ក៏ដូចជាចំណុចដាក់ពង្រាយបណ្តោះអាសន្នសម្រាប់កងកម្លាំងអ៊ុយក្រែន និងទាហានស៊ីឈ្នួលបរទេស។

យោងតាមរបាយការណ៍ យោធារុស្ស៊ី បានគ្រប់គ្រងលើការតាំងទីលំនៅចំនួន ៤កន្លែង នៅក្នុងតំបន់ Donetsk, Dnipropetrovsk និង Zaporozhye ។ លើសពីនេះ ប្រព័ន្ធការពារដែនអាកាសរុស្ស៊ី បានបាញ់ទម្លាក់យានដ្រូនជាង ១. ៦០០គ្រឿង។

កាលពីថ្ងៃសុក្រផងដែរ កងកម្លាំងប្រតិបត្តិការពិសេសរបស់អ៊ុយក្រែន បានរាយការណ៍ថា ការវាយប្រហារDដែលបានកំណត់គោលដៅទៅលើមជ្ឈមណ្ឌលដឹកជញ្ជូននៃកងពលតូចសមុទ្រដាច់ដោយឡែកលេខ ៨១០ របស់រុស្ស៊ីនៅក្នុងតំបន់ Kursk ត្រូវបានធ្វើឡើង កាលពីយប់ថ្ងៃព្រហស្បតិ៍។ ការវាយប្រហារនេះ បានបំផ្លាញឃ្លាំងរំសេវ ឃ្លាំងផ្ទុកសម្ភារៈ និងទីតាំងលាក់ទុកអាវុធ និងគ្រឿងយុទ្ធោបករណ៍ដែលជាកម្មសិទ្ធិរបស់រុស្ស៊ី៕