ប្រធានាធិបតីសហរដ្ឋអាមេរិក លោក Donald Trump បានគំរាមវេណេស៊ុយអេឡាជាមួយនឹងផលវិបាក ដែលមិនអាចគណនាបាន ប្រសិនបើប្រទេសនេះមិនព្រមទទួលយកមកវិញនូវជនអន្តោប្រវេសន៍ដែលរូបលោកបានពិពណ៌នាថាជា "អ្នកទោស" និង "មនុស្សមកពីស្ថាប័នផ្លូវចិត្ត"។

លោកបានសរសេរលើបណ្ដាញសង្គមកាលពីថ្ងៃសៅរ៍ថា យកពួកគេចេញពីប្រទេសរបស់យើងឥឡូវនេះ ឬ អ្នកនឹងខាតបង់ មិនអាចគណនាបាន ។លោកបានទទូចថាវេណេស៊ុយអេឡាបានបង្ខំ មនុស្សបែបនេះចូលក្នុងសហរដ្ឋអាមេរិក ហើយបានអះអាងដោយគ្មានភស្តុតាងថា មនុស្សរាប់ពាន់នាក់បានរងការឈឺចាប់យ៉ាងធ្ងន់ធ្ងរ ហើយថែមទាំងត្រូវបានសម្លាប់ដោយបិសាចទាំងនេះ ។  

ការផ្ទុះកំហឹងចុងក្រោយរបស់លោក Trump បានកើតឡើងស្របពេលមានភាពតានតឹងកាន់តែខ្លាំង មួយថ្ងៃបន្ទាប់ពីលោកបានប្រកាសពីការវាយប្រហារមួយផ្សេងទៀតប្រឆាំងនឹងនាវាដឹកគ្រឿងញៀនដែលត្រូវបានចោទប្រកាន់ចេញពីប្រទេសវេណេស៊ុយអេឡានៅតំបន់ការ៉ាអ៊ីប ដោយបានសម្លាប់មនុស្សប្រុសបីនាក់ដែលលោកបានហៅថាជាពួកភេរវករបុរស។

ដោយឡែក វេណេស៊ុយយអេឡា បានចោទប្រកាន់សហរដ្ឋអាមេរិកថា បានធ្វើសង្រ្គាមមិនប្រកាសនៅសមុទ្រការ៉ាអ៊ីប ហើយបានអំពាវនាវឱ្យមានការស៊ើបអង្កេតរបស់អង្គការសហប្រជាជាតិលើការវាយប្រហារយ៉ាងហោចណាស់បីលើកលើទូក ដែលបានសម្លាប់មនុស្សសរុប ១៧ នាក់ចាប់តាំងពីដើមខែកញ្ញាមក៕