ប្រធានាធិបតីអាមេរិក លោក Donald Trump បានគំរាមជាថ្មីលើអាហ្វហ្គានីស្ថានជាមួយនឹងផលវិបាកធ្ងន់ធ្ងរ លុះត្រាតែប្រគល់មូលដ្ឋានទ័ព Bagramឲ្យមកទីក្រុង Washingtonវិញ។ 

ការគំរាមមិនបញ្ជាក់ច្បាស់កាលពីថ្ងៃសៅរ៍កើតឡើង មួយថ្ងៃ បន្ទាប់ពីរដ្ឋាភិបាលគ្រប់គ្រងដោយក្រុមតាលីបង់ បានច្រានចោលការអំពាវនាវរបស់លោក Trump ក្នុងការប្រគល់មូលដ្ឋានទ័ពអាកាសដ៏ធំ ស្ថិតនៅចម្ងាយ៦៤គីឡូម៉ែត្រពីរដ្ឋធានី Kabul របស់អាហ្វហ្គានីស្ថាន។

លោកបានសរសេរនៅលើបណ្ដាញសង្គម Truth Social របស់លោកថា បើអាហ្វហ្គានីស្ថានមិនព្រមប្រគល់មូលដ្ឋានទ័ពឲ្យសហរដ្ឋអាមេរិកដែលជាអ្នកបង្កើត វិញនោះទេ នោះនឹងពុំមានរឿងអ្វីកើតឡើងក្រៅពីរឿងអាក្រក់នោះឡើយ។  

មូលដ្ឋានទ័ព Bagram ដែលជាទីតាំងដ៏ធំទូលាយមួយ គឺជាមូលដ្ឋានដ៏សំខាន់សម្រាប់កងកម្លាំងអាមេរិកក្នុងប្រទេសអាហ្វហ្គានីស្ថានក្នុងអំឡុងសង្គ្រាមពីរទសវត្សរ៍ ដែលបានធ្វើឡើងបន្ទាប់ពីការវាយប្រហារនៅថ្ងៃទី១១ ខែកញ្ញា ឆ្នាំ ២០០១ នៅទីក្រុងញូវយ៉ក និងវ៉ាស៊ីនតោនដោយក្រុមអាល់កៃដា។

ក្រុមតាលីបង់ បានដណ្ដើមយកបានមូលដ្ឋាននេះក្នុងឆ្នាំ២០២១ ក្រោយសហរដ្ឋអាមេរិក ដកទ័ពចេញ និងការដួលរលំនៃរដ្ឋាភិបាលអាហ្វហ្គានីស្ថាន ហើយក្រុមនេះបានគ្រប់គ្រងប្រទេសនេះ ចាប់តាំងពីពេលនោះមក៕