ភ្នំពេញ៖ នៅសល់ប្រមាណ៣ថ្ងៃទៀត ប៉ុណ្ណោះការសែនចូលឆ្នាំថ្មីប្រពៃណីចិនវៀតណាម នឹង​ឈានចូលមកដល់ សម្រាប់ថ្ងៃនេះដែរ បណ្តាប្រជាពលរដ្ឋខ្មែរកាត់សែស្រឡាយចិន គឺបាននាំគ្នាសម្រុកទៅទិញទំនិញអាហារបន្លែត្រីសាច់ផ្លែឈើ និងគ្រឿងរបស់របរនានាសម្រាប់សែនចូលឆ្នាំចិន ​តែការទិញហាក់មានការថយចុះ។

បើតាមបណ្តាអាជីវករនៅផ្សារក្រុងតាខ្មៅ ខេត្តកណ្តាល និងអាជីវករនៅផ្សារច្បារអំពៅ​រាជធានី​ភ្នំពេញ បាថ្លែងប្រាប់ BTV នៅថ្ងៃទី២៨ ខែមករានេះថា ពលរដ្ឋកាត់សែចិន មានទំលាប់ធ្វើពិធីសែន​ចូល​ឆ្នាំចិន គឺបាននាំគ្នាមកទិញទំនិញរបស់របរ អាហារបន្លែផ្លែឈើត្រីសាច់ជាធម្មតា ហើយការទិញ​នោះហាក់​មានកាត់បន្ថយមុខទំនិញបន្តិច ខណៈស្ទើរគ្រប់ទំនិញដែលបំរើអោយ​ការធ្វើពិធីសែន​មួយចំនួន ​ហាក់មានការឡើងថ្លៃជាងបណ្តាឆ្នាំកន្លងមក។

ពលរដ្ឋកាត់សែចិន ថ្លែងថា នៅក្នុងអំឡុងពេលនេះ បើទោះមុខទំនិញសែនចូលឆ្នាំចិន មានការ​ឡើងថ្លៃ​ក៏ដោយ ក៏យើងនៅតែទិញជាចាំបាច់ ​ខណៈការសែនថ្ងៃចូលឆ្នាំចិននោះ គឺតែងតែបាន​រៀបចំតាមទំលាប់ពីដូនតាមកដោយមិនអាចអាកខានបានឡើយ។

បើតាមលោក អ៊ិន យ៉ុម ប្រធានផ្សារក្រុងតាខ្មៅ ខេត្តកណ្តាល បានថ្លែងថា នៅក្នុងអំឡុងពេលនេះ គណៈកម្មការផ្សារតាខ្មៅគឺបានណែនាំអោយបណ្តាអាជីវករទាំងអស់សូមលក់ទំនិញកុំដំឡើងថ្លៃខ្ពស់ហួសហេតុ ​ហើយគ្រប់មុខទំនិញគឺយើង​តម្រូវ​អោយ​អាជីវករត្រូវដាក់​ស្លាកតំលៃ​អោយ​បាន​ត្រឹមត្រូវ ជាពិសេសគ្រប់មុខទំនិញគឺត្រូវរក្សាគុណភាព​ចៀសវាង​ការប្រើសារធាតុគីមី​ដែលនាំអោយ​ប៉ះពាល​សុខភាពពលរដ្ឋ។

លោក អ៊ិន យ៉ុមបន្តថា ជាទូទៅផ្សាររបស់លោក ក៏ដូចបណ្តាផ្សារសាធារណៈនានាទៀត បច្ចុប្បន្ន​បើទោះ ស្ថានការកូវីដ១៩កំពុងមានការធូរស្រាលយ៉ាងណាក៏ដោយ ​ជានិច្ចកាល យើងតែងតែដាក់​កងកម្លាំងចុះល្បាតតាមតូប ​ដោយធ្វើយ៉ាងណាអោយបណ្តាអ្នកលក់អ្នកទិញត្រូវតែពាក់ម៉ាស់ រក្សាគន្លាត​ មិនអោយប្រជ្រៀតគ្នាចូលទិញទំនិញ និងតាមដាននូវរាល់តម្លៃមុខទំនិញលើទីផ្សារ​មិនអោយ​ឡើងថ្លៃខុសប្រក្រតី៕ អត្ថបទ៖ ស៊ុម សុខជា