ចក្រភពអង់គ្លេស និងព័រទុយហ្គាល់ ត្រូវគេរំពឹងថានឹងទទួលស្គាល់រដ្ឋប៉ាឡេស្ទីននៅថ្ងៃអាទិត្យនេះ នៅមុនសប្តាហ៍ដ៏សំខាន់មួយនៅឯការជួបជុំរបស់អង្គការសហប្រជាជាតិ ដែលក្រុមប្រទេសនានាគ្រោងនឹងទទួលស្គាល់ដែរ ដើម្បីដាក់សម្ពាធលើអ៊ីស្រាអែលជុំវិញសង្គ្រាមនៅតំបន់ហ្កាហ្សា។ 

មេដឹកនាំពិភពលោកនឹងប្រមូលផ្តុំសម្រាប់ការជជែកដេញដោលដ៏សំខាន់មួយនៅឯមហាសន្និបាតអង្គការសហប្រជាជាតិនៅទីក្រុងញូវយ៉ក សប្តាហ៍ក្រោយ ជាទីដែលហៅថាដំណោះស្រាយរដ្ឋពីរចំពោះជម្លោះអ៊ីស្រាអែល និងប៉ាឡេស្ទីន នឹងនៅខាងមុខ និងកណ្តាល។   

ប្រទេសប្រហែល១០ ត្រូវគេរំពឹងថានឹងទទួលស្គាល់រដ្ឋប៉ាឡេស្ទីនក្នុងពេលខាងមុខនេះ ទន្ទឹមនឹងទូរទស្សន៍ BBC រាយការណ៍ថានាយករដ្ឋមន្ត្រីអង់គ្លេស លោក Keir Starmer នឹងប្រកាសការផ្លាស់ប្តូរគោលនយោបាយនៅថ្ងៃអាទិត្យ នេះ ជុំវិញការជំទាស់យ៉ាងខ្លាំងក្លារបស់អ៊ីស្រាអែល។

លោក Starmer បាននិយាយកាលពីខែកក្កដាថា ចក្រភពអង់គ្លេសនឹងទទួលស្គាល់ជាផ្លូវការនូវរដ្ឋប៉ាឡេស្ទីន ប្រសិនបើអ៊ីស្រាអែលបរាជ័យក្នុងការបង្កើត "ជំហានសំខាន់ៗ" ឆ្ពោះទៅរកបទឈប់បាញ់ជាមួយក្រុមហាម៉ាស នៅពេលមហាសន្និបាតអង្គការសហប្រជាជាតិបានធ្វើឡើង។

ក្រសួងការបរទេសព័រទុយហ្គាល់លោក Paulo Rangel បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា ប្រទេសព័រទុយហ្គាល់នឹងទទួលស្គាល់រដ្ឋប៉ាឡេស្ទីននៅថ្ងៃអាទិត្យនេះ៕