ពលរដ្ឋនៅក្នុងទីក្រុងហ្កាហ្សា កំពុងរត់ភៀសខ្លួនតាមរថយន្ត រទេះសេះ ឬថ្មើរជើង ដោយផ្ទុកជាមួយអ៊ីវ៉ាន់សំពីងសំពោង ខណៈពលរដ្ឋហ្កាហ្សាផ្សេងទៀត នាំគ្នាដើរកាត់ផ្លូវតាមបណ្តោយឆ្នេរនៅភាគកណ្តាលតំបន់ហ្កាហ្សាបន្ទាប់ពីការបញ្ជាឲ្យជម្លៀសខ្លួនរបស់អ៊ីស្រាអែល ។

តម្លៃជម្លៀសខ្លួននេះ ត្រូវបានគេរាយការណ៍ថា មានតម្លៃមិនតិចជាង ៧៥០ដុល្លារនោះឡើយ ជាហេតុបង្ខំឲ្យពលរដ្ឋជាច្រើនគ្មានប្រាក់ចំណាយ ត្រូវដើរ ឬរង់ចំាជម្រើសផ្សេង ។

អ្នកស្រី Husam Daloul វ័យ ៥៨ឆ្នាំ ដែលរត់ភៀសខ្លួនជាមួយសមាជិកគ្រួសារ ១០នាក់របស់គាត់ និយាយថា ពួកយើងគ្មានសង្ឃឹមសូម្បីតែការចាកចេញ ពីព្រោះពួកយើងគ្មានប្រាក់ធ្វើដំណើរនោះទេ ស្របពេលដែលគ្រួសាររបស់គាត់ រង់ចាំដំណោះស្រាយចំពោះការជម្លៀសខ្លួនរបស់ពួកគេ ។

រថក្រោះអ៊ីស្រាអែល បានរុលចូលតាមច្រក ២ ទៅកាន់មជ្ឈមណ្ឌលទីក្រុងហ្កាហ្សាកាលពីថ្ងៃព្រហស្បតិ៍ម្សិលមិញ ។

ប្រព័ន្ធអ៊ិនធឺណិត និងខ្សែទូរស័ព្ទ ត្រូវបានកាត់ផ្តាច់នៅទូទាំងដែនដីបិទច្រកមួយនេះ គឺជាសញ្ញាមួយដែលប្រតិបត្តិការជើងគោក ទំនងជាកើនឡើង ។

យោងតាមការអះអាងរបស់អាជ្ញាធរសុខាភិបាលប៉ាឡេស្ទីននៅហ្កាហ្សា បានឲ្យដឹងថា ចំនួនមនុស្សស្លាប់សរុបរបស់ជនប៉ាឡេស្ទីនពីសង្រ្គាមរយៈពេល ២ឆ្នាំរវាងអ៊ីស្រាអែល និងក្រុមហាម៉ាស បានកើនឡើងជាង ៦៥.០០០នាក់ គិតត្រឹមថ្ងៃពុធម្សិលមិញ ។

ក្រុមមន្រ្តីប៉ាឡេស្ទីន និយាយថា តួលេខពិតប្រាកដអាចនឹងខ្ពស់ជាងនេះ ស្របពេលដែលមនុស្សជាច្រើនបានជាប់នៅក្រោមគំនរបាក់បែកនៃអគាររងការបំផ្លិចបំផ្លាញ ៕