ប្រធានាធិបតីសហរដ្ឋអាមេរិកលោក Donald Trump បានគំរាមអាហ្វហ្គានីស្ថានថា បើសិនជាពួកគេពុំព្រមប្រគល់មូលដ្ឋានទ័ពអាកាស Bagram មកកាន់ភាគីសហរដ្ឋអាមេរិកវិញទេនោះ រឿងអាក្រក់នឹងកើតឡើង ។

 លោក Trump បាននិយាយកាលពីថ្ងៃព្រហស្បតិ៍សប្តាហ៍មុនថា សហរដ្ឋអាមេរិកនឹងព្យាយាមទទួលការគ្រប់គ្រងមូលដ្ឋានទ័ពអាកាសនេះដែលធ្លាប់ប្រើប្រាស់ដោយកងកម្លាំងអាមេរិក បន្ទាប់ពីការវាយប្រហារកាលពីថ្ងៃទី ១១ខែកញ្ញា ឆ្នាំ ២០០១ ។

 លោកបាននិយាយប្រាប់ក្រុមអ្នកសារព័ត៌មានថា លោកកំពុងនិយាយជាមួយអាហ្វហ្គានីស្ថាន ពាក់ព័ន្ធនឹងបញ្ហាមួយនេះ ។

 ទោះបីជាយ៉ាងណាក៏ដោយ មេបញ្ជាការកងទ័ពតាលីបង់លោក Qari Fasihuddin កាលពីថ្ងៃអាទិត្យ បានច្រានចោលការព្យាករថា ក្រុមរបស់លោកបានចរចាលើអតីតមូលដ្ឋានទ័ពអាកាសសហរដ្ឋអាមេរិក Bagram រយៈពេល ១ថ្ងៃ ក្រោយលោកប្រធានាធិបតី Donald Trump ព្រមានថា រឿងអាក្រក់នឹងកើតឡើង បើសិនជាអាហ្វហ្គានីស្ថាន ពុំប្រគបល់មូលដ្ឋានមួយនេះ មកភាគីសហរដ្ឋអាមេរិកវិញទេនោះ ។

 នៅក្នុងសេចក្តីថ្លែងការណ៍ជាវីដេអូ លោក Fasihuddin បានធ្វើការធានាថា ក្រុមតាលីបង់នឹងមិនចរចាប្រគល់ដីអាហ្វហ្គានីស្ថានសូម្បីប៉ុនចុងក្រចក ។

 លោកថា នេះជារឿងដែលមិនអាចទៅរួចនោះទេ ពួកយើងមិនខ្លាចនរណា ពួកយើងគ្មានទ្រព្យ និងគ្មានអំពើក្បត់ជាតិនោះដែរ ៕