ពលរដ្ឋអ៊ីស្រាអែល នាំគ្នាដង្ហែរក្បួននៅក្នុងទីក្រុងហ្សេរុយសាឡឹម និងទីក្រុងតែល អាវីវ អំពាវនាវឲ្យបញ្ចប់សង្រ្គាមនៅតំបន់ហ្កាហ្សា ហើយនិងការវិលត្រឡប់មកវិញរបស់ចំណាប់ថ្នូរដែលជាប់ឃុំនៅដែនដីមួយនេះ ។

 ក្រុមបាតុករនាំគ្នាគ្រវីទង់ជាតិ ស្រែកពាក្យស្លោក និងកាន់បដាមានរូបថតចំណាប់ថ្នូរ ។ ការដង្ហែរក្បួននេះ បានទាក់ទាញមនុស្សរាប់ម៉ឺននាក់ឲ្យមកចូលរួម ស្របពេលដែលអ៊ីស្រាអែលនៅតែបន្តវាយប្រហារទីក្រុងហ្កាហ្សា និងដែនដីហ្កាហ្សាស្រ្ទីប ដោយកម្ទេចផ្លូវក្រោមដីនៅក្នុងការវាយប្រហារមួយបណ្តាលឲ្យជនប៉ាឡេស្ទីន ៣៤នាក់ បាត់បង់ជីវិត ។

 កងកម្លាំងអ៊ីស្រាអែលដែលបានគ្រប់គ្រងតំបន់ជាយក្រុងភាគខាងកើតទីក្រុងហ្កាហ្សា បានបើកការវាយប្រហារតំបន់ Sheikh Radwan និងតំបន់ Tel Al-Hawa ជាកន្លែងដែលពួកគេឈរ ដើម្បីត្រៀមខ្លួនរុលចូលតំបន់ភាគកណ្តាល និងតំបន់ភាគខាងលិចទីក្រុងហ្កាហ្សា ជាទីដែលពលរដ្ឋភាគច្រើន បានជ្រកកោន ។

យោងតាមការអះអាងរបស់អាជ្ញាធរសុខាភិបាលប៉ាឡេស្ទីននៅហ្កាហ្សា បានឲ្យដឹងថា ចំនួនមនុស្សស្លាប់សរុបរបស់ជនប៉ាឡេស្ទីនពីសង្រ្គាមរយៈពេល ២ឆ្នាំរវាងអ៊ីស្រាអែល និងក្រុមហាម៉ាស បានកើនឡើងជាង ៦៥.០០០នាក់ គិតត្រឹមថ្ងៃពុធម្សិលមិញ ។

ក្រុមមន្រ្តីប៉ាឡេស្ទីន និយាយថា តួលេខពិតប្រាកដអាចនឹងខ្ពស់ជាងនេះ ស្របពេលដែលមនុស្សជាច្រើនបានជាប់នៅក្រោមគំនរបាក់បែកនៃអគាររងការបំផ្លិចបំផ្លាញ ៕